لاہور: فیڈرل انویسٹی گیشن ایجنسی (ایف آئی اے) نے منی لانڈرنگ کیس میں پرویز الہٰی کو گرفتار کر لیا۔
تفصیلات کے مطابق چوہدری پرویز الہٰی کو ایف آئی نے گرفتار کر لیا، انھیں منی لانڈرنگ کیس میں کیمپ جیل لاہور سے گرفتار کیا گیا ہے۔
واضح رہے کہ گزشتہ روز اینٹی کرپشن عدالت نے غیر قانونی بھرتیوں کے کیس میں پی ٹی آئی کے صدر چوہدری پرویز الہٰی کی ضمانت منظور کر لی تھی، اور محکمہ اینٹی کرپشن نے ان کو دوبارہ گرفتار نہ کرنے کا فیصلہ کیا تھا۔
پرویز الہٰی کے خلاف پنجاب اسمبلی میں غیر قانونی بھرتیوں اور سرکاری ٹھیکوں میں کمیشن لینے کے الزام پر مقدمات درج ہیں، ان کے خلاف لاہور کے تھانے میں کار سرکار میں مداخلت اور پولیس پر تشدد کا مقدمہ بھی درج ہے۔
گزشتہ روز ہی سابق وزیر اعلیٰ پنجاب چوہدری پرویز الہٰی کے خلاف ایف آئی اے حکام نے ایک اور مقدمہ درج کر لیا تھا، ان کے خلاف مقدمہ اینٹی منی لانڈرنگ سرکل میں درج ہوا تھا، جس میں ان کے صاحب زادے مونس الہٰی کو بھی نامزد کیا گیا ہے۔
سابق وزیر اعلیٰ پنجاب کو عدالتوں سے ضمانتیں ہونے کے باوجود متعدد مرتبہ مختلف مقدمات میں گرفتار کیا جا چکا ہے۔
