کراچی : پاکستان کی سستی ترین ایئرلائن فلائی جناح نے مسافروں کی سہولت کیلئے پروازوں میں مزید اضافے کا اعلان کردیا۔
ایئر لائن ترجمان کے مطابق فلائی جناح نے کراچی اور اسلام آباد کے درمیان پروازوں کی تعداد میں اضافہ اور نئے شیڈول کا اعلان کیا ہے جو کہ یکم جون2023سے نافذالعمل ہوگا۔
ترجمان کے مطابق ایئر لائن اب کراچی اور اسلام آباد کے درمیان مسافروں کی سہولت کو مد نظر رکھتے ہوئے ہفتہ میں تین پروازیں چلائے گی۔
ترجمان کا کہنا ہے کہ جیسے جیسے موسم گرما قریب آرہا ہے،ان دو بڑے شہروں کے درمیان سستی اور قابل بھروسہ فضائی سفر کی طلب میں اضافہ ہوتا جارہا ہے۔
فلائی جناح کا مقصد کنیکٹیویٹی کو بڑھانا اور کاروبار و تفریح کی غرض سے سفر کرنے والے مسافروں کی ضروریات کو پورا کرتے ہوئے ہموار اور خوشگوار سفر کے تجربہ کو یقینی بنانا ہے۔
فلائی جناح معیاری سروس، مؤثر آپریشنز اور زیادہ کنیکٹیویٹی پیش کرتے ہوئے مسافروں کے تجربہ کو ترجیح پر رکھتے ہوئے انتہائی کم قیمت پر قابل بھروسہ اور آرام دہ سفر کی فراہمی کیلئے پر عزم ہے،
ترجمان نے کہا کہ اس وقت فلائی جناح پاکستان کے پانچ بڑے شہروں کو ملاتی ہے، جن میں کراچی، اسلام آباد، لاہور،پشاور اور کوئٹہ شامل ہیں۔
فلائی جناح کے بیڑے میں فی الحال تین جدید ائیر بس320شامل ہیں،اکانومی کیبن میں مسافروں کو اضافی آرام کی فراہمی کیلئے کشادہ نشستوں کا استعمال کیا گیا ہے۔
ہوائی جہاز میں مفت آن لائن اسٹریمنگ سروس”اسکائی ٹیم“بھی دستیاب ہے جس سے مسافر تفریح کے وسیع تر انتخاب کو اپنی ڈیوائسز پر بھی منتقل کرسکتے ہیں۔
اس کے علاوہ مسافر انتہائی مناسب قیمتوں پر ”اسکائی کیفے“کے مینیو سے ناشتہ، سینڈوچز اور مختلف اقسام کے دیگر پکوانوں سے بھی لطف اندوز ہوسکتے ہیں۔
