کویت نے 6 ماہ باہر رہنے والے غیرملکیوں کے اقامے کینسل کرنا شروع کردیا ہے۔
کویت ٹائمز کی رپورٹ کے مطابق کویت کی وزارت داخلہ نے 6 ماہ سے زائد عرصے تک کویت سے باہر رہنے والے 5000 غیر ملکی کے رہائشی اجازت ناموں (اقاموں) کی تجدید کی درخواستوں کو مسترد کر دیا ہے۔
تارکین وطن نے اپنے اقاموں کی تجدید کے لئے آن لائن درخواستیں یہ کہتے ہوئے جمع کرائیں کہ انہیں بیماری، خاندانی و مالی مسائل سمیت دیگر وجوہات کی بنا پر کویت سے باہر رہنا پڑا۔
وزارت داخلہ کا کہنا ہے کہ دیگر تارکین وطن بھی اس ماہ اپنے اقامہ سے محروم ہو جائیں گے۔
وزارت، اقامتی امور کے محکمے کے ذریعے 6 ماہ سے کویت سے باہر رہنے والے کسی بھی غیر ملکی کے اقامہ کو خود بخود اور فوری طور پر منسوخ کر دیتی ہے۔
وزارت داخلہ کے ذرائع نے بتایا کہ “پبلک اتھارٹی آف مین پاور اور پبلک اتھارٹی برائے سول انفارمیشن کے ساتھ ایک خودکار لنک کے ذریعے ایک ایسے تارکین وطن کا ورک پرمٹ بھی منسوخ کر دیا جاتا ہے جس کی رہائش منسوخ کر دی گئی ہے جبکہ ان کا سول کارڈ بھی منسوخ کر دیا جاتا ہے”۔
اکتوبر میں کویتی وزارت داخلہ نے اعلان کیا کہ 6 ماہ یا اس سے زیادہ عرصے سے ملک سے باہر رہنے والے سرکاری شعبے (آرٹیکل 17)، پرائیویٹ سیکٹر میں شراکت داروں (آرٹیکل 19)، زیر کفالت افراد (آرٹیکل 22)، طلباء (آرٹیکل 23)، خود کفیل رہائشی (آرٹیکل 24) اور نجی شعبہ کے ملازمین (آرٹیکل 18) کے رہائشی اجازت ناموں کی الیکٹرانک منسوخی شروع کر دے گی۔
ذرائع نے بتایا کہ “ملک سے باہر ان کی موجودگی کی مدت یکم اگست 2022 سے 31 جنوری 2023 تک شمار کی گئی تھی اور پھر ان کا اقامہ خود بخود منسوخ ہو جائے گا، کیونکہ انہیں ملک چھوڑے ہوئے چھ ماہ گزر چکے ہیں”۔
ذرائع نے یہ بھی اشارہ کیا کہ کویتی وزارت داخلہ نے تمام تارکین وطن کے اقاموں کا جائزہ لینا شروع کر دیا ہے جو کہ ورک پرمٹ حاصل کرنے میں ناکامی سمیت افرادی قوت کے ساتھ ہم آہنگی کے ساتھ انہیں اقامہ دینے کی شرائط میں سے کسی ایک سے محروم ہونے پر منسوخ کر دی جائیں گی۔
