کراچی : اسپیشل انویسٹی گیشن یونٹ نے کے الیکٹرک کا قیمتی سامان چوری کرنے اور لوٹنے والے گینگ کے ایک کارندے کو گرفتار کرلیا۔
تفصیلات کے مطابق کراچی میں اسپیشل انویسٹی گیشن یونٹ نے کے الیکٹرک کا قیمتی سامان چوری کرنے اور لوٹنے والے گینگ کو بے نقاب کردیا۔
ایس آئی یو نے گینگ کے ایک کارندے کو بھاری سامان سمیت گرفتار کرلیا، ایس ایس پی ایس آئی یو جنید شیخ نے بتایا کہ رواں ماہ مختلف مقامات سے کے الیکٹرک کا قیمتی سامان چوری کرنے کی پانچ وارداتیں ہوئیں، جس کے بعد وارداتوں میں ملوث ملزمان کی گرفتاری کا ٹاسک ایس آئی یو پولیس کو دیا گیا تھا۔
جنید شیخ کا کہنا تھا کہ ایس آئی یو نے خفیہ اطلاع پر جمشید کوارٹرز میں کارروائی کی اور کارروائی کے دوران گینگ ممبر رحمان شاہ کو گرفتار کرلیا۔
ایس ایس پی ایس آئی یو نے کہا کہ ملزم نے چوری اور لوٹا ہوا سامان کیماڑی کے قریب ڈیرے میں چھپا رکھا تھا، ملزم کی نشاندہی پر سکندر آباد کیماڑی سے چوری اور لوٹا گیا سامان اور گاڑی برآمد کرلی ہے۔
