پشاور : سی این جی اسٹیشنز کو گیس کی فراہمی معطل کرنے کا فیصلہ کرلیا گیا، پشاور ریجن کے تمام سی این جی اسٹیشنز کو گیس سپلائی معطل کردی جائے گی۔
تفصیلات کے مطابق سوئی ناردرن گیس پائپ لائنز لمیٹڈ (ایس این جی پی ایل) نےسی این جی اسٹیشنوں کو گیس کی فراہمی معطل کرنے کا فیصلہ کرلیا۔
ترجمان نے کہا ہے کہ فیصلہ گھریلو صارفین کو گیس کی طلب میں اضافے کے پیش نظرکیاگیا، پشاور ریجن کے تمام سی این جی اسٹیشنز کو گیس سپلائی کل سے معطل کردی جائے گی۔
یاد رہے صوبائی دارالحکومت لاہور سمیت پنجاب کے مختلف علاقوں کو بجلی اور گیس کی قلت کا سامنا ہے۔
ذرائع کے مطابق بجلی کی طلب اور رسد میں کمی کے باعث پنجاب کے شہروں میں لوڈشیڈنگ کا دورانیہ تین گھنٹے اور دیہی علاقوں میں چھ گھنٹے تک بڑھ گیا ہے کیونکہ حکومت مبینہ طور پر بند پاور پلانٹس کو دوبارہ کھولنے میں ناکام رہی ہے۔
اس سے قبل سوئی سدرن گیس کمپنی لمیٹڈ نے گیس بحران کے سنگین ہونے پر کراچی کی صنعتوں کو گیس کی فراہمی معطل کرنے کا اعلان کیا تھا۔
