کراچی : پاکستان ٹیلی ویژن کے ڈراموں میں اپنی شاندار اداکاری کی صلاحیتوں کے جوہر دکھانے والی ماضی کی معروف اداکارہ غزالہ کیفی نے بتایا ہے کہ شمع ڈرامے میں اداکار شکیل کے بجائے جاوید شیخ کو کیوں لیا گیا تھا؟
ٹی وی ڈراموں میں اپنی منفرد اداکاری سے نمایاں مقام حاصل کرنے والی اداکارہ غزالہ کیفی نے اے آر وائی ڈیجیٹل کے پروگرام گڈ مارننگ پاکستان میں شرکت کی اور اپنی زندگی میں پیش آنے والے حالات و واقعات سے ناظرین کو آگاہ کیا۔
پروگرام کی میزبان ندا یاسر کی جانب سے پوچھے گئے ایک سوال پر کہ ٹی وی پر پہلی بار کیسے آئیں یا اس کی شروعات کیسے ہوئی؟ جس کے جواب میں انہوں نے بتایا کہ پہلے تو مجھے گھر والوں کی جانب سے شوبز میں جانے کی قطعی اجازت نہیں تھی، پھر فاطمہ ثریا بجیا نے گھر آکر میرے امی ابو سے بات کی تب کہیں جاکر کام کا آغاز کیا۔
غزالہ کیفی نے بتایا کہ شمع ڈرامے کیلیے فاطمہ ثریا بجیا نے پہلے اداکار شکیل کو ہی لیا تھا لیکن انہوں نے مجھے دیکھے بغیر یہ کہہ کرمنع کردیا کہ میں کسی نئی لڑکی کے ساتھ کام نہیں کروں گا کیونکہ اس وقت یہ بہت مشہور اور کامیاب اداکار تھے جس کے بعد جاوید شیخ کو لے لیا گیا۔
جب بعد میں شکیل کو پتہ چلا اور ڈرامہ آن اسکرین ہوا تو انہوں نے بجیا سے جا کر کہا کہ ری پلیس کردیں جس پر بجیا کا کہنا تھا کہ اب کچھ نہیں ہوسکتا۔ انہوں نے بتایا کہ میرا نام غزالہ ہی ہے لیکن مجھے گھر میں راحیلہ کہہ کر پکارا جاتا ہے۔
