برطانیہ میں شکاری چاند نمودار ہوگیا، انوکھے چاند کے باعث آسمان پر پیدا ہونے والی سرخی نے لوگوں کو سحر زدہ کردیا۔
برطانیہ کے کچھ حصوں میں دکھائی دیا جانے والا یہ چاند ہنٹر مون یعنی شکاری چاند کہلاتا ہے۔ ہر سال کی طرح اس سال بھی یہ اپنی پوری آب و تاب کے ساتھ نمودار ہوا اور لوگوں کو سحر زدہ چھوڑ گیا۔
چودہویں کا یہ انوکھا چاند ہر سال اکتوبر کے اختتام پر نمودار ہوتا ہے اور ہر 4 سال بعد نومبر میں دیکھا جاتا ہے۔
اس چاند کی یہ انفرادیت زمین سے اس کے فاصلے، سفر کے مراحل اور موسم کی وجہ سے پیدا ہوتی ہے، یہ چاند خزاں کی آمد کا اشارہ ہے۔
یہ چاند سال کا سب سے چھوٹا مکمل (چودہویں) کا چاند تھا کیونکہ یہ اپنے سفر کے قاعدے کے مطابق اس وقت اپنے مدار کے بالکل آخری حصے اور زمین سے سب سے زیادہ فاصلے پر موجود ہے۔
غروب آفتاب کے ساتھ جب یہ چاند طلوع ہونا شروع ہوتا ہے تو اس وقت سرخی مائل ہوتا ہے اور اس کے باعث آسمان بھی سرخ ہوجاتا ہے۔ اس چاند کو ٹریول مون بھی کہا جاتا ہے۔
اس چاند کا نام رکھے جانے کی تاریخ ان لوک روایات پر مبنی ہے جب شکاری اور کسان شکار کی تلاش اور فصلوں کی کٹائی اس چاند کی روشنی میں کیا کرتے تھے۔
اس چاند سے ایک روایت یہ بھی منسوب ہے کہ یہ اس بات کا اشارہ ہے کہ اب اگلے سرد مہینوں کے لیے گوشت محفوظ کرلیا جائے۔
طلوع اور غروب ہونے کے وقت کے علاوہ بظاہر اس چاند اور چودہویں کے دیگر چاندوں میں کوئی فرق نہیں ہوتا۔
