لدھیانہ: بھارتی اداکار اور پنجابی سپر اسٹار گپی گریوال نے اضافی پیسوں کے لیے کینیڈا میں باتھ روم صاف کرنے کا انکشاف کر دیا ہے۔
تفصیلات کے مطابق ایک انٹرویو میں پنجابی اداکار اور سنگر گپی گریوال نے کہا ہے کہ انھیں کینیڈا میں باتھ روم صاف کرنے پر اضافی پیسے ملتے جس پر وہ خوشی سے کام کرتے تھے۔
لدھیانہ سے تعلق رکھنے والے اداکار نے شوبز میں آنے سے پہلے کا قصہ سناتے ہوئے کہا جب کینیڈا میں ان کی اپنی اہلیہ رونیت کور کے ساتھ رہائش تھی تو وہاں ایک وقت پر تین تین کام کرنے پڑتے تھے، یہاں تک کہ باتھ روم بھی صاف کیے۔
گِپی گریوال نے بتایا ’شوبز میں آنے سے پہلے وہ اور ان کی اہلیہ صبح چار بجے اٹھ کر لوگوں کے گھروں میں اخبار پھینکنے کا کام کرتے تھے اور باتھ روم بھی صاف کرتے تھے جس پر انھیں اضافی پیسے مل جاتے تھے، جن سے انھوں نے اپنے میوزک کیریئر کا آغاز کیا۔‘
انھوں نے کہا ہماری بدقسمتی ہے کہ یہاں (انڈیا میں) باتھ روم صاف کرنے کو اچھا کام نہیں سمجھا جاتا کہ یہ ایک مزدوری ہے، کینیڈا میں مجھے اس سے کوئی شرمندگی نہیں ہوئی۔
یاد رہے کہ گپی گریوال نے اپنے میوزک کیریئر کا آغاز 2002 میں کیا تھا، جب کہ 2010 میں آنے والی پنجابی فلم ’میل کرا دے ربا‘ گپی گریوال کی ڈیبیو فلم تھی، تاہم 2012 میں آنے والی بلاک بسٹر فلم ’کیری آن جٹا‘ گپی گریوال کے کیریئر کی سب سے بہترین فلم ثابت ہوئی۔
انھوں نے اب تک کئی سپر ہٹ فلموں میں کام کیا، جن میں کیری آن جٹا، ارداس، جٹ جیمز بانڈ، منجی بسترے، لکی دی ان لکی سٹوری اور سنگھ ورسس کور شامل ہیں، جب کہ ان کی نئی فلم ہے ’ہنی مون‘۔
