مسقط : خلیجی ممالک نے اعلان کیا ہے کہ غیرملکی کارکنوں کیلئے ’اینڈ آف سروس سسٹم‘ تیار کیا جائے گا۔
تفصیلات کے مطابق مذکورہ نظام کے تحت کارکنوں کے لیے سروس کے اختتامی فوائد کو ضم کرنے کی تکنیکی اور انتظامی پیچیدگیوں کا جائزہ لیا جائے گا۔
اس حوالے سے خلیجی میڈیا رپورٹس میں بتایا گیا ہے کہ سلطنت عمان نے جی سی سی وزراء برائے سول سروس اور لیبر کے نویں اجلاس کی قیادت کی۔
اجلاس میں رکن وزارتی کمیٹیوں کو پیش کی گئی اہم سفارشات پر تبادلہ خیال کرنے کے لیے بلایا گیا اور اس میں جی سی سی سیکرٹریٹ جنرل اور جی سی سی لیبر منسٹرز کے ایگزیکٹو آفس نے شرکت کی۔
اجلاس میں عالمی فورمز پر خاص طور پر سول سروس اور لیبر کے شعبوں سے متعلق موضوعات اور تعاون کے شعبوں پر بھی غور و خوص کیا گیا۔
اجلاس میں اقتصادی اور ترقیاتی امور کے اسسٹنٹ سیکرٹری خالد علی السنیدی نے کہا کہ جی سی سی ممالک کے رہنما جدید ترین پروگراموں اور لیبر مارکیٹ میں انضمام کے ذریعے مستقبل کی تشکیل میں ملازمت کے متلاشیوں کے اہم کردار پر زور دیتے ہیں۔
اجلاس کے اہم نتائج میں اسٹریٹجک اقدامات اور منصوبوں کے تصور کے ساتھ ساتھ کام اور افرادی قوت کے شعبے میں مشترکہ خلیجی کارروائی کے لیے حکمت عملی کی توثیق بھی شامل تھی۔
معلوم ہوا ہے کہ اجلاس میں جی سی سی ممالک کی وزارت محنت اور ریٹائرمنٹ اور انشورنس فنڈز کی نمائندگی کرنے والی ایک خصوصی ٹیم کے قیام کی منظوری دی گئی۔
ماہرین کی ٹیم جی سی سی ریاستوں میں موجود سماجی تحفظ کے فریم ورک میں غیر ملکی کارکنوں کے لیے سروس کے اختتامی فوائد کو ضم کرنے کی تکنیکی اور انتظامی پیچیدگیوں کا جائزہ لے گی۔
اجلاس میں اراکین نے سیکرٹریٹ جنرل کی آن دی جاب ٹریننگ کی تجویز پر بھی روشنی ڈالی۔
