قومی ٹیم کے سابق ڈائریکٹر محمد حفیظ نے دورہ نیوزی لینڈ میں اعظم خان کو تین میچز کے بعد موقع نہ دینے کی وجہ بیان کردی۔
اے اسپورٹس کے پروگرام ’دی پویلین‘ میں گفتگو کرتے ہوئے سابق کپتان محمد حفیظ نے بتایا کہ ٹیم مینجمنٹ نے اعظم خان کو بتادیا تھا کہ انہیں مستقل طور پر ڈراپ نہیں کیا جارہا ہے۔
محمد حفیظ نے کہا کہ ذاتی طور پر میں اعظم خان کو مزید موقع دینا چاہتا تھا لیکن انتظامیہ نے فیصلہ کیا کہ وہ تین میچوں میں پرفارم نہیں کرسکے اور مطلوبہ نتائج دینے میں ناکام رہے۔
سابق کپتان نے کہا کہ ہمیں اعظم خان کا اعتماد بحال کرنا تھا تاکہ سوشل میڈیا پر لوگ ان پر تنقید نہ شروع کردیں۔
قبل ازیں سابق کرکٹر نے فاسٹ بولر حارث رؤف کو فرسٹ کلاس اور ڈومیسٹک کرکٹ کھیلنے کا مشورہ دیا تھا، ان کا کہنا تھا کہ رؤف سمیت دیگر پاکستان پلئیرز ٹیسٹ کرکٹ نہیں کھیلیں گے، اپنی بالنگ، بیٹنگ کی خامیوں پر قابو پانے میں ناکام رہیں گے۔
واضح رہے کہ اعظم خان کو نیوزی لینڈ کے خلاف سیریز میں 3 میچز میں پرفارم نہ کرنے کے بعد ڈراپ کردیا گیا تھا جبکہ پی ایس ایل میں وہ اسلام آباد یونائیٹڈ کی نمائندگی کررہے ہیں۔
