برطانیہ کے شاہ چارلس سوم کی تاریخی تاجپوشی میں ان کے بیٹے شہزادہ ہیری اور اہلیہ میگھن مارکل کو مدعو کر لیا گیا ہے، تاہم دونوں کی جانب سے تقریب میں شریک ہونے کی تصدیق نہیں کی گئی۔
برطانیہ کے میگزین سنڈے ٹائمز کے مطابق شہزادہ ہیری اور اہلیہ میگھن مارکل شاہ چارلس کی تاجپوشی کی تقریب میں شرکت کریں گے یا نہیں، اس بارے میں کچھ نہیں کہا جاسکتا، دوسری جانب بکنگھم پیلس نے بھی اس حوالے سے تبصرہ کرنے سے انکار کردیا ہے۔
اس سے قبل شاہی مبصر نے شاہ چارلس سوم کو خبردار کیا تھا کہ تاجپوشی کی تقریب میں شہزادہ ہیری اور میگھن مارکل کی موجودگی تاریخی تقریب کو برباد کر دے گی۔
شاہی مبصر نے میڈیا سے گفتگو میں کہا تھا کہ اگر وہ ہیری کو تاجپوشی میں آنے دیتے ہیں تو یہ تقریب برباد ہوجائے گی اور اس تقریب میں ساری توجہ بھی ہیری اور میگھن پر مرکوز ہوجائے گی، اس حوالے سےشاہ چارلس کو سنجیدگی سے کوئی فیصلہ کرنا ہوگا۔
واضح رہے کہ برطانیہ کے شاہ چارلس سوم کی تاجپوشی کی تقریب 6 مئی کو ویسٹ منسٹر ایبے میں منعقد ہوگی، بکنگھم پیلس نے اعلان کیا تھا کہ تاجپوشی کی تقریب روایتی انداز میں ہوگی جو پچھلے 1 ہزار سال سے ایسی تقاریب میں اختیار کیا جاتا ہے۔
