اچھی صحت کیلئے غذائیت سے بھرپور اشیاء کا استعمال بہت ضروری ہے لیکن اس کے ساتھ ساتھ اس بات کا بھی خیال رکھنا چاہیے کہ کھانا کس وقت اور کیا کھانا ہے؟
ویسے کچھ لوگوں کے اندر کھانے سے متعلق بری عادات ہوتی ہیں کیونکہ وہ کھانے کے وقت اور اس کے انتخاب پر غور نہیں کرتے جو سامنے آیا کھالیا چاہے اس کا کوئی بھی نتیجہ ہو۔
کھانے میں بےاحتیاطی کا اثر دل پر زیادہ پڑتا ہے جس کی وجہ سے انسان امراض قلب کا شکار ہوسکتا ہے کیونکہ دل کی زیادہ تر بیماریاں اور ہائی بلڈ پریشر انسان کے کھانے کے بےترتیب طریقوں کی وجہ سے ہوتی ہیں۔
’ہیلتھ ڈائجسٹ‘ کی ویب سائٹ کی رپورٹ کے مطابق ڈاکٹرز اور ماہرین صحت نے کھانے کی تین ایسی عادات کے بارے میں بات کی ہے جو دل کی صحت کے لیے انتہائی نقصان دہ ہیں۔
ڈاکٹروں اور ماہرین صحت نے عوام سے اپیل کی ہے کہ وہ کھانوں سے متعلق ان تین عادات سے لازمی بچیں بصورت دیگر سنگین بیماریوں میں مبتلا ہوسکتے ہیں۔
نیوٹریشنسٹ اور کولینا ہیلتھ کے شریک بانی تمر سیموئلز نے بتایا کہ سیر شدہ چکنائی ایل ڈی ایل کولیسٹرول کو بڑھاتی ہے، یہ دل کی بیماری کے بڑھتے ہوئے خطرے سے منسلک برا کولیسٹرول ہے۔
مندرجہ ذیل سطور میں ہیلتھ ڈائجسٹ کی رپورٹ میں درج کھانے کی تین ایسی عادات کی نشاندہی کی گئی ہے جس سے دل کی صحت کے معاملے میں مکمل پرہیز کرنا چاہیے۔
بے فکری سے کھانا
ماہرین کھانا کھاتے وقت "ذہنی طور پر تیار رہنے ” کی ضرورت کے بارے میں بتاتے ہیں کہ یہ عمل کھانے سے لطف اندوز ہونے اور پیٹ کی خرابی کو روکنے میں مدد دیتا ہے اور دل کی صحت کو بھی یقینی بناتا ہے۔
ماہرین کا کہنا ہے کہ ایسا کرنے سے آپ کو اپنے کھانے سے زیادہ لطف اندوز ہونے اور ضرورت سے زیادہ کھانے کو محدود کرنے میں مدد ملتی ہے۔ کیا آپ جانتے ہیں آپ کے دماغ کو یہ بات بتانے میں لگ بھگ 20منٹ لگتے ہیں کہ آپ کا پیٹ بھر گیا ہے؟
کھانا چھوڑنا
کھانا چھوڑ دینا دل کی صحت کے لیے اچھا خیال نہیں ہے، ہم بہت سی وجوہات کی بنا پر کھانا چھوڑ دیتے ہیں جن میں بہت مصروفیات یا کھانا لذیذ نہ ہونا ہوتا ہے۔
اپنے پسندیدہ کھانے کو چھوڑنا اچھا خیال نہیں ہے کیونکہ یہ بھوک، شوگر اور زیادہ کیلوریز والے کھانوں کی خواہش کا باعث بنتا ہے۔ اپنی خواہشات کو متوازن کرنے کے لیے ہر تین سے چار گھنٹے میں متوازن کھانے کا ہدف طے کیجئے۔
کھانا دیر سے کھانا
اس کے علاوہ کھانا دیر سے کھانے کی عادت آپ کے دل کو بھی متاثر کر سکتی ہے، میٹھی اسنیکس اور زیادہ کیلوریز والی غذائیں کھانے سے خون میں کولیسٹرول کی سطح، دل کی بیماری، فالج، موٹاپا، ذیابیطس اور دانتوں کی خرابی ہوسکتی ہے۔
