نیپال میں ماؤنٹ ایورسٹ کے قریب نجی تجارتی ہیلی کاپٹر لاپتہ ہوگیا، ہیلی کاپٹر میں 5 غیر ملکیوں سمیت 6 افراد سوار ہیں۔
بھارتی میڈیا کے مطابق نجی تجارتی ہیلی کاپٹر سولوکھمبو سے کھٹمنڈو جا رہا تھا، جس میں 5 غیر ملکی سوار تھے جن کی شناخت میکسیکو کے شہریوں کے طور پر ہوئی ہے۔
حکام نے بتایا کہ ہیلی کاپٹر کا منگل کے روز تقریباً صبح 10 بجے رابطہ منقطع ہوا اور 10:12 بجے (مقامی وقت کے مطابق) ریڈار سے دور ہو گیا۔
تریبھون بین الاقوامی ہوائی اڈے (ٹی آئی اے) کے منیجر اور انفارمیشن آفیسر نے بتایا کہ ہیلی کاپٹر سولوکھمبو سے کھٹمنڈو جا رہا تھا اور صبح تقریباً 10 بجے کنٹرول ٹاور سے اس کا رابطہ منقطع ہوگیا، ہیلی کاپٹر کا 12 ہزار فٹ سے اوپر کی بلندی پر اچانک رابطہ ٹوٹا ہے۔
دوسری جانب ہیمالین ٹائمز کے مطابق نجی طیارے کے کپتان سینئر کپتان چیت بی گرونگ ہے، ہیلی کاپٹر رابطہ سے باہر ہے، ٹاور سے کوئی رابطہ نہیں ہے، آخری بار ہیلی کاپٹر کے وائبر سے صرف ‘ہیلو’ کا پیغام موصول ہوا۔
