اے آر وائی ڈیجیٹل کے ڈرامہ سیریل ’سکون‘ میں بہن بھائی کا کردار نبھانے والے اداکار سدرہ نیازی اور خاقان شاہنواز کیا حقیقت میں بھی بہن بھائی ہیں؟
پروگرام ’گڈ مارننگ پاکستان‘ میں سدرہ نیازی اور خاقان شاہنواز نے شرکت کی اور کردار کی مناسبت اور اپنے بہن بھائی ہونے کی خبروں پر وضاحت بھی پیش کی۔
خاقان شاہنواز ’رضا‘ اور سدرہ نیازی ’شانزے‘ نے سامعین کی الجھن کو دور کردیا جو ان کے ملتے جلتے انداز کی وجہ سے پائی جارہی تھی۔
خاقان اور سدرہ نے کاسٹنگ کا سہرا معروف ہدایت کار سراج الحق کو دیا اور واضح کیا کہ ان کا ایک دوسرے سے کسی بھی طرح سے کوئی تعلق نہیں ہے۔
خاقان شاہنواز نے کہا کہ ڈائریکٹر نے چاروں کرداروں، سدرہ، مجھے اور تجربہ کار عتیقہ اوڈھو، عثمان پیرزادہ کو ایک خاندان کے طور پر کاسٹ کیا کیونکہ وہ سب ایک جیسے نظر آتے ہیں۔
جب ان سے پوچھا گیا کہ آپ دونوں دور کے رشتے دار ہیں تو انہوں نے کہا کہ سدرہ کا تعلق پٹھان فیملی سے ہے جبکہ میں پنجابی فیملی سے تعلق رکھتا ہوں۔
واضح رہے کہ ڈرامے میں احسن خان اور ثنا جاوید مرکزی کردار نبھا رہے ہیں، دیگر کاسٹ میں قدسیہ علی، لیلیٰ واسطی، عدنان صمد خان، اسما عباس اور احسن طالش شامل ہیں۔
سکون کی کہانی مصباح نوشین نے لکھی ہے جبکہ ہدایت کار سراج الحق ہیں۔ ڈرامہ بدھ اور جمعرات کو 8 بجے نشر کیا جاتا ہے۔
