مالٹا: پاناما لیکس کا انکشاف کرنے والی تنظیم آئی سی آئی جے نے آج رات 11 بجے مزید سنسنی خیز انکشافات کرنے کا اعلان کردیا۔
سماجی رابطے کی ویب سائٹ ٹویٹر پر آئی سی آئی جے نے آج رات 11 بجے پاناما کی طرح مزید سنسی خیز انکشافات کرنے کا اعلان کردیا ہے، دستاویزات سامنے آنے کے بعد دنیا میں ایک بار پھر نیا ہنگامہ کھڑا ہوسکتا ہے۔
واضح ہے کہ دو برس قبل اپریل میں بحراوقیانوس کے کنارے پر واقع ملک پاناما کی صحافتی تنظیم آئی سی آئی جے نے غیر قانونی اثاثہ جات کی ڈیڑھ لاکھ دستاویزات شائع کی تھیں جس کے باعث دنیائے مملک کی کئی حکومتیں ہل گئیں تھیں۔
پاناما لیکس میں یورپی ملک آئس لینڈ کے وزیراعظم سگمندر گنلگسن اور اُن کی اہلیہ کا نام سامنے آنے کے بعد عوام نے شدید احتجاج کی جس کے بعد انہیں مجبورا وزارت سے مستعفیٰ ہونا پڑا تھا۔ دستاویزات میں سابق برطانوی وزیراعظم ڈیوڈ کیمرون کا نام بھی سامنے آیا جس کے بعد انہیں عدالتوں میں پیش ہوکر صفائی دینی پڑی تھی۔
پڑھیں: پاناما پیپرز کو منظر عام پر آئے ایک سال مکمل
پاناما دستاویزات میں سابق وزیراعظم میاں محمد نوازشریف سمیت دیگر 400 سے زائد افراد کے نام سامنے آئے تھے، شریف خاندان کی آفشور کمپنیاں منظر عام پر آنے کے بعد نوازشریف نے قوم سے خطاب کر کے مطمئن کرنے کی کوشش کی مگر وہ ناکام رہے۔
سپریم کورٹ کی ہدایت پر پاناما لیکس کی تحقیقات کے لیے بینچ تشکیل دیا گیا جس نے نوازشریف کو نااہل قرار دیتے ہوئے آفشور کمپنیوں کی مزید تحقیقات نیب کے سپرد کردیں۔
آئی سی آئی جے کے رکن عمر چیمہ کا ٹویٹ
دوسری جانب آئی سی آئی جے کے لیے کام کرنے والے پاکستانی صحافی عمر چیمہ نے سماجی رابطے کی ویب سائٹ پر اپنے ایک ٹویٹ میں کہا کہ پاکستانیو!! پاناما تہلکہ کی دوسری قسط کے لیے تیار ہوجاؤ۔
انہوں نے کہا کہ پاناما دستاویزات کے لیے رات 11 بجے کا انتظار کریں، پاناما کی دوسری قسط سے سرمایہ داروں کو شدید دھچکا لگےگا اور یہ سرمایہ دارانہ نظام کو ہلا کر رکھ دے گی۔
اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔
