انسٹاگرام اور فیس بک کی ملکیتی پیرنٹ کمپنی میٹا نے بھی ویریفائیڈ اکاؤنٹ کے لیے فیس لینے کا اعلان کیا ہے۔
میٹا نے بھی ان دونوں پلیٹ فارمز کے صارفین کے لیے ٹوئٹر جیسا اقدام اپنایا ہے، اب صارف تقریباً 12 ڈالر میں ویریفائیڈ اکاؤنٹ (تصدیقی اکاؤنٹ) حاصل کر سکیں گے۔
میٹا نے اپنی ویب سائٹ پر اعلان کرتے ہوئے کہا کہ سبسکرپشن ادائیگی کرنے والے صارفین کو نیلے رنگ کا بیج، ان کی پوسٹس کی ویزیبلٹی (زیادہ صارفین اسے دیکھ پائیں گے) میں اضافہ، نقالی کرنے والوں سے تحفظ اور کسٹمر سروس تک آسان رسائی فراہم کرے گی۔
کمپنی کا کہنا ہے کہ یہ تبدیلی پہلے سے تصدیق شدہ اکاؤنٹس کو متاثر نہیں کرے گی، تاہم کچھ چھوٹے صارفین کے لیے ویزیبلٹی میں اضافہ ہوگا جو ادائیگی کی خصوصیت کی بدولت تصدیق شدہ بن جائیں گے۔
کیا آپ انسٹا گرام پر بلیو ٹک حاصل کرنے کا طریقہ جانتے ہیں؟
میٹا نے کہا کہ انسٹاگرام اور فیس بک کے صارف ناموں کو تصدیق کے لیے حکومت کی جانب سے فراہم کردہ شناختی دستاویز سے مماثل ہونا چاہیے، اور صارفین کی پروفائل تصویر ایسی ہونی چاہیے جس میں ان کا چہرہ نظر آ رہا ہو۔
میٹا نے ابھی تک یہ واضح نہیں کیا ہے کہ یہ فیچر دوسرے ممالک میں کب متعارف کرایا جائے گا، تاہم مارک زکربرگ نے کہا ہے کہ ’ایسا جلد ممکن‘ ہوگا۔
