.کراچی : جناح اسپتال میں ٹک ٹاکر عائشہ کی لاش چھوڑ کر فرار ہونے کے کیس میں گرفتار ملزم جبران نے عدالت میں بیان دیا کہ زمین پر گری ہوئی خاتون کی جان بچانا میرا جرم بن گیا۔
تفصیلات کے مطابق جوڈیشل مجسٹریٹ جنوبی/ سٹی کورٹ میں جناح اسپتال میں ٹک ٹاکر عائشہ کی لاش چھوڑ کر فرار ہونے کے کیس کی سماعت ہوئی۔
پولیس نے ملزم جبران کو عدالت میں پیش کیا ، پولیس نے عدالت میں بتایا کہ ملزم کے سی آر او اور مفرور ملزمان سے متعلق تفتیش کے لئے جسمانی ریمانڈ دیا جائے، ملزم کو سی سی ٹی وی فوٹیج کی مدد سے گرفتار کیا گیا۔
ملزم جبران نے عدالت میں بیان دیا کہ مجھ پر کوئی تشدد نہیں کیا گیا ، زمین پر گری ہوئی خاتون کی جان بچانا میرا جرم بن گیا۔
عدالت نے استفسارکیا کہ آپ نے ایمبولینس یا ون فائیو پر کال کیوں نہیں کی، جس پر وکیل صفائی نے کہا کہ ملزم کی شرافت اس کے گلے پڑ گئی ہے، ملزم نے ان پڑھ ہونے کی وجہ سے پولیس یا ایمبولینس سروس سے رابطہ نہیں کرسکا۔
جس پر عدالت نے ملزم جبران کو دو روزہ جسمانی ریمانڈ پر پولیس کے حوالے کردیا اور ملزم کو 30 جون کو دوبارہ عدالت میں پیش کرنے کا حکم دیتے ہوئے تفتیشی افسر سے آئندہ سماعت پر پیشرفت رپورٹ طلب کرلی۔
