اسلام آباد: چیئرمین پی ٹی آئی نے 9 ضمانتیں خارج کیے جانے کے فیصلے چیلنج کر دیے۔
تفصیلات کے مطابق 9 مئی سے متعلق مقدمات، جوڈیشل کمپلیکس حملہ کیسز اور جعل سازی کے مقدمے میں ضمانتیں خارج ہونے پر پی ٹی آئی چیئرمین نے اپنے وکیل سلمان صفدر کے ذریعے اسلام آباد ہائیکورٹ میں 9 درخواستیں دائر کر دی ہیں۔
سیشن کورٹ سے چیئرمین پی ٹی آئی کی 6 جب کہ انسداد دہشت گردی کی عدالت (اے ٹی سی) سے 3 ضمانتیں خارج ہوئی ہیں، دائر درخواستوں میں عدالت سے استدعا کی گئی ہے کہ چیئرمین پی ٹی آئی کی 9 مقدمات میں ضمانتیں خارج کرنے کے فیصلے کالعدم قرار دیے جائیں۔
درخواست میں کہا گیا کہ ٹرائل کورٹ نے میرٹ کو دیکھے بغیر ہی ضمانتیں عدم پیروی پر خارج کر دیں، اس لیے انصاف کے تقاضے پورے کرنے کے لیے ٹرائل کورٹس کے فیصلے کالعدم قرار دیے جائیں۔
چیئرمین پی ٹی آئی نے اسلام آباد ہائیکورٹ سے استدعا کی ہے کہ ٹرائل کورٹس کو دوبارہ کیسز سن کر میرٹ پر فیصلے کرنے کی ہدایت کی جائے، اور ان 9 مقدمات میں پولیس کو گرفتاری سے روکا جائے۔
