مہاراشٹر: بھارت میں 5 سالہ بچے کی لاش کئی گھنٹوں بعد نالے سے برآمد کرلی گئی۔
بھارت کی ریاست مہاراشٹر کے مسلم اکثریتی شہر مالی گاؤں میں گزشتہ روز 5 سالہ محمد شہزاد شفیع مسجد کے پاس سے لاپتہ ہوگیا تھا جس کے بعد علاقے میں ہل چل مچ گئی تھی اور بچے کی تلاش کیلئے اہلخانہ نے سوشل میڈیا پر لاپتہ ہونے کی پوسٹ شیئر کی۔
بھارتی میڈیا کے مطابق تلاش کرنے کے 7 گھنٹے بعد رات دیر گئے اطلاع ملی کہ بچے کی لاش علاقے کی نیشنل پیٹرول پمپ کے پیچھے آواڑی نالے میں اوپر کی طرف نظر آرہی ہیں۔
رپورٹ کے مطابق اطلاع ملنے کے بعد اہلخانہ، سوشل ورکروں سمیت پولیس بھی موقع پر پہنچ گئی، اور لاش کو باہر نکالنے کے بعد سول اسپتال روانہ کردیا جہاں ڈاکٹر نے بچے کے موت کی تصدیق کی۔
بھارتی میڈیا کے مطابق نالے میں دو سے ڈھائی فٹ پانی جمع تھا جس میں بچے کی لاش تیرتی ہوئی نظر آئیں، جس کے بعد یہ سوال اٹھایا جارہا ہے کہ دو سے ڈھائی فٹ پانی میں بچہ کس طرح ڈوب سکتا ہے یہ حادثہ ہے یا کچھ اور اس پر پولیس نے کارروائی شروع کردی۔
پولیس کا کہنا ہے کہ پوارواڑی پولیس کی موجودگی میں پوسٹ مارٹم اور دیگر قانونی کارروائی کے بعد نعش کو اہل خانہ کے سپرد کردیا گیا جبکہ اطراف کے سی سی ٹی وی کیمروں کو اچھی طرح چیک کیا جارہا ہے۔
