دہلی: بھارت کی حکمراں جماعت بی جے پی کے ایک کونسلر نے گوشت کی دکانیں بند کرا دیں، جس کی ویڈیو وائرل ہو گئی ہے۔
بھارتی میڈیا رپورٹس کے مطابق بھارت میں دہلی کے علاقے ویسٹ ونود نگر وارڈ کے کونسلر رویندر سنگھ نیگی کو نوراتری کے دوران اپنے وارڈ میں گوشت کی دکانیں بند کراتے ہوئے دیکھا گیا۔
نوراتری تہوار کے دوران کئی ریاستوں میں گوشت کی دکانیں بھی 9 دن کے لیے بند کرنے کی ہدایت کی جاتی ہے، جس کی وجہ سے کافی سیاست ہوتی ہے۔
اس واقعے کی ویڈیو سوشل میڈیا پر کافی وائرل ہو رہی ہے، جس میں کونسلر دکان داروں سے گوشت کی دکانیں بند کرنے کو کہہ رہے ہیں۔
Location: Vinod Nagar, Delhi
BJP councilor Ravinder Singh Negi forced Muslim meat shops to close for Navratri. He further claimed that they didn’t have a license. pic.twitter.com/xtDjdzhAop
— HindutvaWatch (@HindutvaWatchIn) March 28, 2023
اس دوران دکان داروں نے کہا کہ ہماری دکان پہلے ہی بند ہے اور دکان کے کام سے شٹر کھول رکھا ہے۔
یہ پہلا موقع نہیں ہے جب بی جے پی کے کسی لیڈر نے دہلی میں گوشت کی دکانیں بند کرائی ہوں، گزشتہ سال جنوبی دہلی کے سابق میئر مکیش سوریا نے بھی گوشت کی دکانیں 9 دن تک بند رکھنے کا حکم جاری کیا تھا، جس پر کافی ہنگامہ ہوا۔
ویڈیو: انتہا پسند ہندوؤں نے مسجد کے اندر امام کو تشدد کا نشانہ بنا دیا
واضح رہے کہ اس مرتبہ کارپوریشن کی جانب سے گوشت کی دکانوں کو ایسی کوئی ہدایت نہیں دی گئی ہے۔ بی جے پی رہنما کی اس ویڈیو پر متعدد افراد اپنے ردعمل کا اظہار کر رہے ہیں، تاہم سیاسی جماعتوں کی جانب سے کوئی ردعمل سامنے نہیں آیا ہے۔
