نئی دہلی میں اسرائیلی سفارتخانے کے قریب دھماکا سنا گیا ہے بھارتی ذرائع ابلاغ کا کہنا ہے کہ دھماکے کی شدت پریشان کن تھی۔
تفصیلات کے مطابق بھارتی میڈیا کا کہنا ہے کہ اسرائیلی سفارت خانے کے قریب دھماکا 5 بجکر 20 منٹ پر ہوا۔ بھارتی پولیس کی جانب سے نئی دہلی میں اسرائیلی سفارتخانے کی سیکیورٹی بڑھا دی گئی ہے۔
اطلاعات کے مطابق بھارتی پولیس نے علاقے کو پوری طرح سے گھیرے میں لے لیا ہے جبکہ میڈیا کو بھی آگے جانے سے روک دیا گیا ہے۔
بھارتی میڈیا کا کہنا ہے کہ ابھی یہ پتا نہیں چل سکا کہ دھماکا کس نوعیت کا ہے، بھارتی پولیس تحقیقات کررہی ہے۔ اسرائیلی سفارتخانے کے اطراف سرچ آپریشن کیا جارہا ہے۔
دریں اثنا اسرائیلی سفارتخانے کی جانب سے بھی تصدیق کی گئی ہے کہ سفارتخانے کے قریب دھماکا سنا گیا ہے جس کی تحقیقات جاری ہیں۔
اسرائیل کی وزارت خارجہ کا کہنا ہے کہ دھماکے کے بعد تمام عملہ محفوظ ہے کسی کو نقصان نہیں پہنچا جبکہ اسرائیلی حکام دھماکے کی تحقیقات کے لیے بھارتی حکام کے ساتھ تعاون کر رہے ہیں۔
