کویت میں ایک بھارتی شہری خوفناک ٹریفک حادثے کا شکار ہوکر زندگی کی بازی ہار گیا، مذکورہ واقعے کی ویڈیو بھی منظر عام پر آگئی ہے۔
بین الاقوامی خبر رساں ادارے کی رپورٹ کے مطابق دو روز قبل یہ افسوسناک واقعہ فحاحیل ایکسپریس وے پر مبارک الکبیر ہسپتال کے قریب پیش آیا، جب ایک نوجوان گاڑیوں کو روکنے کی کوشش کے دوران خود ٹریفک حادثے کا شکار ہوگیا۔
حکام کی جانب سے افسوس ناک واقعے کے بعد متوفی کی لاش کو فرانزک میڈیسن ڈپارٹمنٹ منتقل کردیا گیا ہے، جبکہ واقعے کی ہر زویے سے تحقیقات کا آغاز بھی کردیا گیا ہے۔
ابتدائی تحقیقات سے یہ بات سامنے آئی ہے کہ دو کاریں آپس میں ٹکرانے کے بعد ایک ہندوستانی نوجوان اپنی ہی تباہ شدہ گاڑی سے باہر نکلا اور دوسری گاڑیوں کو روکنے کی کوشش کرنے لگا تاکہ دیگر افراد حادثے کا شکار نہ ہوجائیں۔
مگر اسی دوران ایک پرتگالی کار ڈرائیور نے بھارتی نوجوان کو کچل دیا، جس کے باعث وہ موقع پر ہی دم توڑ گیا، مقتول کو اسپتال منتقل کیا گیا جہاں ڈاکٹرز نے انتقال کی تصدیق کردی۔
بین الاقوامی میڈیا رپورٹ میں بتایا گیا ہے کہ بھارتی نوجوان حال ہی میں وزٹ ویزا پر کویت پہنچا تھا، حکام کی جانب سے واقعے کا مقدمہ درج کرلیا گیا ہے، پرتگالی ڈرائیور سے تفتیش کی گئی لیکن بعد میں اسے رہا کر دیا گیا۔
