نئی دہلی : بھارتی ریسلرز خواتین نے حکمراں جماعت کے برج بھوشن شرن سنگھ پر جنسی ہراسانی کا الزام عائد کرتے ہوئے پولیس میں الگ الگ شکایت درج کروادی۔
تفصیلات کے مطابق بھارتی خواتین پہلوانوں نے بی جے پی کے رکن پارلیمنٹ اور ریسلنگ فیڈریشن آف انڈیا (ڈبلیو ایف آئی) کے صدر برج بھوشن شرن سنگھ کے خلاف پولیس میں الگ الگ شکایت درج کروادی،جس میں ان پر جنسی ہراسانی اور مجرمانہ دھمکیاں دینے کا الزام لگایا ہے۔
نئی دہلی کے کناٹ پلیس پولیس اسٹیشن میں جمعہ کو درج کرائی گئی اپنی شکایات میں پہلوانوں نے جنسی طور پر ہراساں کیے جانے کے متعدد واقعات کا حوالہ دیا ہے، جو کہ 2012 اور حالیہ 2022 کے ہیں، شکایت کنندگان کا کہنا ہے کہ انہیں نتائج کا سامنا کرنے کا خوف ہے۔
نئی دہلی میں بی جے پی رہنما کیخلاف احتجاج کاسلسلہ جاری ہے، احتجاج کی قیادت اولمپک میڈل جیتنے والی ریسلر بجرنگ پونیا کر رہی ہیں۔
خواتین پہلوان کا کہنا ہے کہ بھارت میں جب ہم محفوظ نہیں ہیں تو پھر دوسری لڑکیوں کا کیا ہوگا؟
کھلاڑیوں نے ایک پریس کانفرنس میں دعویٰ کیا کہ وہ گزشتہ ڈھائی ماہ سے انصاف کے منتظر ہیں لیکن ان کی کوئی شنوائی نہیں ہوئی اور اب انھیں جھوٹا سمجھا جا رہا ہے۔
حکمراں جماعت کے برج بھوشن پر سات ریسلر خواتین کے ساتھ جنسی ہراسانی کا الزام ہے تاہم تین ماہ گزرنے کے بعد بھی بی جے پی رہنما کیخلاف مقدمہ درج نہیں ہوسکا۔
خیال رہے جنوری 2023 کو پہلوان ونیش پھوگاٹ، ساکشی ملک اور بجرنگ پونیا دہلی کے جنتر منتر پہنچے اور ریسلنگ فیڈریشن کے صدر برج بھوشن شرن سنگھ کے خلاف کئی سنگین الزامات لگائے۔
اس کے بعد ونیش پھوگاٹ نے روتے ہوئے کہا تھا کہ برج بھوشن سنگھ اور کوچ، نیشنل کیمپ میں خواتین ریسلرز کو جنسی طور پر ہراساں کرتے ہیں۔
