راولپنڈی : بلوچستان میں معصوم بچوں کو دہشت گرد بنانے کا انکشاف سامنے آیا، ملک دشمنوں کے سہولت کار مذموم مقاصد کیلئے بچوں کااستعمال کررہے ہیں۔
تفصیلات کے مطابق بلوچستان انمول قدرتی خزانوں سے مالا مال ہے اور منفرد جغرافیائی خصوصیات اسے خاص بناتے ہیں، ایسے میں سی پیک جیسا گیم چینجر منصوبہ دشمن کی آنکھ میں نوکیلے خنجر کی طرح پیوست ہوچکا ہے۔
صوبے کے امن کو نقصان پہنچانے کے لیے ملک دشمنوں کی گھناونی سازشیں بے نقاب ہورہی ہے، بلوچستان میں مذموم مقاصد کے حصول کے لیے خواتین اور بچوں کو بھی دہشت گردی کی آگ کا ایندھن بنایا جارہا ہے.
بچوں سے قلم اور کتابیں چھین کر بم بنانے اور ہتھیار چلانے کی تربیت دی جارہی ہے، ماہر بلوچ کی خو دکش حملے کی تیاری کے دوران گرفتاری اس بات کا ثبوت ہے دہشت گردوں نے بچوں سے ان کی معصومیت بھی چھین لی ہے۔
پنگجور کا تیرہ سال کا معصوم عبدالرزاق بھی اس گھناؤنی سازش کا شکار ہوا، عبدالرزاق نے ایف سی کے سامنے ہتھیار ڈال دیئے۔
13 سال کےعبدالرزاق کو گمراہ کرکے غلط راستے پر ڈال دیا گیا، چھوٹی عمر میں عبدالرزاق کو ہتھیار چلانا بم بنانا سکھایا گیا۔
دشمنوں کی جانب سے بچوں کو بہکا کر ملک دشمن بنایا جارہا ہے، پڑھنے لکھنے اورکھیلنے کی عمر میں دہشت گردی کی تربیت دی جارہی ہے تاہم سیکیورٹی فورسزامن دشمنوں کے ناپاک عزائم خاک میں ملانے میں سرگرم ہے۔
