اسلام آباد : ایرانی سفیر ڈاکٹررضا امیری نے خبردار کیا ہے کہ اسرائیل بہت چھوٹا اورکمزورہےایران کے خلاف کوئی غلطی نہ کرے اور مطالبہ کیا کہ اسلامی ممالک اسرائیل سے تعلقات ختم کریں۔
تفصیلات کے مطابق ایرانی سفیر ڈاکٹررضا امیری نے اے آر وائی نیوز کو خصوصی انٹرویو دیتے ہوئے کہا کہ اسرائیل کے حملوں سے فلسطین کے اسپتال اور مساجدبھی محفوظ نہیں، اسرائیل کی بربریت پہلےسے زیادہ بے رحم اور وسیع پیمانے پر ہے۔
ایرانی سفیر کا کہنا تھا کہ غزہ پر حملے بین الاقوامی،انسان دوست بلکہ جنگی اصولوں کےبھی منافی ہیں اور صیہونی مظالم پر عالمی طاقتوں نے آنکھیں بند کررکھی ہیں۔
ڈاکٹر امیری نے خبردار کیا کہ اسرائیل بہت چھوٹا اورکمزور ہے ایران کےخلاف کوئی غلطی نہ کرے۔
انتڑویو میں انھوں نے مطالبہ کیا کہ جتنےبھی اسلامی ممالک نےاسرائیل سےتعلقات استوار کیےانہیں ختم کریں،اسرائیلی پروڈکٹس پر پابندی لگائیں اوراقتصادی تعلقات ختم کریں ساتھ ہی تمام اسلامی ممالک اپنےبارڈرزکھولیں تاکہ فلسطینیوں کی امداد ہوسکے۔
ایرانی سفیر کا کہنا تھا کہ ہم پاکستان کےمشکور ہیں جنہوں نے اسرائیل کو تسلیم نہیں کیا، فلسطین پراسلامی ممالک نےجوموقف اپنایا وہ اچھا مگرناکافی ہے، سعودی عرب اورخطےکےممالک سمجھ گئے امریکا پہلے جیسی طاقت نہیں رہا۔
ڈاکٹر امیری نے کہا کہ اسلامی ممالک میں کوآرڈینیشن ہوتی توصیہونی رجیم اس بربریت کی جرات نہ کرتا، صیہونی رجیم سے تعلقات بنانے والے اسلامی ممالک کو کہا ہےان سےتعلقات ختم کریں، اسلامی مزاحمت پر صیہونی رجیم ڈر اور خوف کا شکار ہے اور یہ مزاحمت ہی اس صیہونی ریاست کےاختتام اوربربادی کا آغاز ہے۔
سعودی عرب سے تعلقات کے حوالے سے ان کا کہنا تھا کہ سعودی عرب سےتعلقات کو وسیع کرنے کی نیت سےمذاکرات میں داخل ہوئے ،اچھے تعلقات کےلیے50فیصد ہمیں اور50فیصد سعودی عرب کو آگےبڑھنا ہے، ہمارا عزم ہے سعودی عرب سےتعلقات کو آگے بڑھائیں۔
ایرانی سفیر نے مزید کہا کہ ایران پاکستان کی حکومت اور عوام کو اپنی حکومت اورعوام سمجھتے ہیں، ایران تو ہر طرح سے پاکستان کی حفاظت کرنا چاہتا ہے۔
