شہر قائد میں جمعرات کے روز ہونے والی موسلا دھار بارش کے بعد ایڈمنسٹریٹر کراچی مرتضیٰ وہاب نے دعویٰ کیا کہ ضلع وسطی میں بادل پھٹا جس پر محکمہ موسمیات نے فوری ردعمل دیا۔
شہر قائد میں جمعرات کے روز ہونے والی موسلا دھار بارش نے شہر کو تالاب میں بدل دیا بالخصوص ضلع وسطی کے علاقوں ناگن چورنگی اور اطراف کی صورتحال ابتر ہوگئی کئی کئی فٹ پانی جمع ہونے سے ٹریفک معطل اور گرین بس سروس بند کردی گئی جس کے بعد ایڈمنسٹریٹر کے ایک ٹوئٹ نے شہریوں میں ہلچل مچا دی۔
ایڈمنسٹریٹر کراچی مرتضیٰ وہاب نے سماجی رابطوں کی ویب سائٹ ٹوئٹر پر اپنے ٹوئٹ میں دعویٰ کیا کہ ضلع وسطی میں بادل پھٹا جس کے نتیجے میں کے ڈی اے اور ناگن چورنگی پر شدید بارش ہوئی۔
مرتضیٰ وہاب نے اپنے ٹوئٹ میں ڈپٹی کمشنر ضلع وسطی کا اسی حوالے سے بیان کا عکس بھی پوسٹ کیا اور مزید لکھا کہ نالوں اور ڈرینیج نظام صحیح کام کرنے سے پانی کی سطح تیزی سے نیچے آرہی ہے۔
ایڈمنسٹریٹر کراچی نے کہا کہ مشینری کام پر لگا دی گئی ہے اور شہر کے تمام انڈر پاسز ٹریفک کیلیے کلیئر ہیں۔
There was a major cloud burst in central district due to which KDA & Nagan Chowrangi have water. However, Naala & drainage line has responded well and water level is coming down. Machinery has been deployed. All underpasses are clear for traffic. Will keep everyone posted. Thanks https://t.co/YnU9tChaCX
— Murtaza Wahab Siddiqui (@murtazawahab1) July 7, 2022
ایڈمنسٹریٹر کراچی کا بادل پھٹنے کے دعوے پر مبنی ٹوئٹ آنے کی دیر تھی کہ محکمہ موسمیات بھی میدان میں آگیا اور اس نے واضح کردیا کہ نیوکراچی اور اس کے اطراف میں بادل نہیں پھٹے۔
ڈائریکٹر محکمہ موسمیات سردار سرفراز نے اپنے بیان میں واضح کیا کہ نیو کراچی اور اطراف میں بادل نہیں پھٹے، تاہم شہر میں وقفے وقفے سے کہیں ہلکی اور کہیں تیز بارش کا سلسلہ جاری ہے۔
ڈائریکٹر محکمہ موسمیات کے مطابق بارش کی پیشگوئی پہلے ہی کردی گئی تھی اور بارش کا یہ سلسلہ ہفتے کے روز تک جاری رہے گا۔
