اسلام آباد: وفاقی دارالحکومت میں ہونے والے خودکش حملے کی تحقیقات کے لئے چیف کمشنر نے جے آئی ٹی کی منظوری دے دی، نوٹیفکیشن جاری کر دیا گیا۔
تفصیلات کے مطابق اسلام آباد کے سیکٹر آئی ٹین فور میں گزشتہ روز ہونے والے خود کش حملہ کیس میں اہم پیشرفت سامنے آئی ہے، اسلام آباد کے چیف کمشنر محمد عثمان نے جے آئی ٹی کی منظوری دیدی۔
اس حوالے سے 5رکنی جوائنٹ انویسٹی گیشن ٹیم کا نوٹیفکیشن جاری کر دیا گیا ہے، جے آئی ٹی کی سربراہی ایس ایس پی سی ٹی ڈی بطور چیئرمین کریں گے۔
نوٹیفکیشن کے مطابق ممبران کے طور پر آئی ایس آئی، آئی بی کے گریڈ 18کے افسران شامل ہوں گے، اس کے علاوہ آئی جی اسلام آباد کی نامزدگی پر پولیس آفیسر جےآئی ٹی کا ممبر ہوسکیں گے۔
ایس ایچ او سی ٹی ڈی اور مقدمہ کا تفتیشی آفیسر بھی جے آئی ٹی کا حصہ ہونگے، جے آئی ٹی اسلام آباد خود کش دھماکے کی مکمل تحقیقات کرکے رپورٹ مرتب کرے گی۔
مزید پڑھیں : اسلام آباد میں خود کش دھماکا، پولیس اہلکار شہید
واضح رہے گزشتہ روز اسلام آباد کے سیکٹر آئی ٹین میں دھماکے میں ایک پولیس اہلکار شہید اور 6 زخمی ہو گئے تھے، خود کش دھماکے میں ہیڈ کانسٹیبل عدیل حسین درجہ شہادت پر فائز ہوئے۔
اسلام آباد میں سکیورٹی ہائی الرٹ تھی اور چیکنگ چل رہی تھی، پولیس جوانوں نے چیکنگ کے دوران ایک مشکوک گاڑی کو روکا، جس کے بعد گاڑی رکتے ہی خود کش بمبار نے خود کو اڑا لیا۔
