نیویارک : نگراں وزیرخارجہ جلیل عباس جیلانی کا کہنا ہے کہ بھارت صرف جاسوسی نہیں بلکہ خطے میں قتل وغارت میں بھی ملوث ہے، بھارت کا چہرہ بے نقاب ہوچکا ہے۔
تفصیلات کے مطابق نگراں وزیرخارجہ جلیل عباس جیلانی نے اے آر وائی نیوز سے خصوصی گفتگو کرتے ہوئے کہا سکھ رہنما کے قتل سے متعلق کہا کہ بھارت کے حوالے سے ہمیں کوئی حیرانی نہیں ہوئی ، ہمیں معلوم تھا بھارت اس خطہ میں ہر ایک ملک میں قتل وغارت میں ملوث ہے۔
جلیل عباس جیلانی کا کہنا تھا کہ کینیڈا کے وزیراعظم اور وزیر خارجہ نے بہت سخت احتجاج کیا ہے، واقعے کی تحقیقات پر زور دیا جا رہا ہے، بھارتی حکومتی باشندے اس قتل میں ملوث تھے۔
نگراں وزیرخارجہ نے کہا کہ بھارت نے جو بڑی جمہوریت ہونے کا ماسک چہرے پر لگایا تھا وہ بری طرح ایکسپوز ہوگیا ہے، بھارت نےکافی عرصےتک پاکستان کے خلاف الزام تراشی اور پروپیگنڈہ کیا، بھارت کے خلاف یورپی ممالک سے بھی آوازیں اٹھ رہی ہیں۔
افغانستان سے متعلق ان کا کہنا تھا کہ افغان حکومت سے ہماری بات چیت چل رہی ہے، پچھلے کئی ماہ سےٹی ٹی پی کی دہشتگردی کےواقعات بڑھ گئےہیں، افغان حکومت سے کہا ہے ٹی ٹی پی کے خلاف کارروائی کرے۔
پاک امریکا تعقات کے حوالے سے جلیل عباس جیلانی نے کہا کہ امریکا کیساتھ بہت اچھے ڈائیلاگ چل رہے ہیں، امریکا کیساتھ ہمارے تعلقات بہت اچھی سمت میں جارہے ہیں۔
انھوں نے بتایا کہ سعودی عرب کے پاکستان سےقریبی تعلقات ہیں، آئندہ چندماہ میں پاکستان میں30سے40بلین کی ڈالرزکی انوسٹمنٹ ہوگی۔
