سکھر : صحافی جان محمد مہر کے قتل کے واقعے پر صحافی سراپااحتجاج ہے، صحافتی تنظیموں نے قاتلوں کی فوری گرفتار کا مطالبہ کردیا ہے۔
تفصیلات کے مطابق سندھ میں صحافیوں کی زندگیاں غیرمحفوظ ہوگئیں، سکھر میں نامعلوم افراد کی فائرنگ سے صحافی جان محمد مہر جاں بحق ہوگئے۔
پولیس کا کہنا تھا کہ صحافی جان محمد مہر پر آفس سے گھر جاتے ہوئے قاتلانہ حملہ کیا گیا، جس کے بعد انہیں تشویشناک حالت میں نجی اسپتال منتقل کیاگیا تاہم وہ جانبر نہ ہوسکے۔
واقعے کے خلاف صحافیوں کا مختلف شہروں میں احتجاج جاری ہے اور صحافتی تنظیموں نے وزیراعلیٰ سے قاتلوں کی فوری گرفتار کا مطالبہ کیا ہے۔
لاڑکانہ میں سکھرکے سینئر صحافی جان محمدمہر کے قاتلوں کی گرفتاری کیلئے صحافیوں نے پریس کلب سےجناح باغ چوک تک ریلی نکالی، صحافیوں نے جناح باغ چوک پر دھرنا دیا اور ٹریفک معطل کردیا۔
گورنر کامران ٹیسوری اور وزیراعلیٰ سندھ مراد علی شاہ نے صحافی جان محمد مہر کے قتل کی مذمت کی۔
مراد علی شاہ کا کہنا تھا کہ کچھ شواہد ملے ہیں، پولیس سے کہا ہے انصاف ہونا چاہیے اور قاتل جلد از جلد گرفتار ہوں جبکہ کامران ٹیسوری کا کہنا تھا کہ جان محمد مہر کی شہادت پر افسوس ہے، پولیس پتا لگائے کہ اس کے پیچھے کون سے عناصر ہیں۔
