کراچی، عید میلاد النبی ﷺ جلوس، متبادل روٹ پلان جاری -
The news is by your side.

Advertisement

کراچی، عید میلاد النبی ﷺ جلوس، متبادل روٹ پلان جاری

کراچی: ٹریفک پولیس نے جشن عید میلاد النبی ﷺ کے موقع پر شہر کی مختلف شاہراؤں کو گاڑیوں کی آمد و رفت کے لیے بند کرنے کا اعلان کرتے ہوئے متبادل روٹ پلان جاری کردیا۔

تفصیلات کے مطابق ڈی آئی جی ٹریفک پولیس نے 12 ربیع الاول کے موقع پر جلوس کے باعث سڑکوں کو  ٹریفک کے لیے بند کرنے کی منظوری دی اور عوام کو پریشانی سے محفوظ رکھنے کے لیے متبادل روٹ پلان بھی جاری کیا۔

ایم اے جناح روڈ کو دوپہر ایک بجے سے عام گاڑیوں کی آمد و رفت کے لیے بند کردیا جائے گا کیونکہ بعد نماز ظہر میمن مسجد سے مرکزی جلوس روانہ ہوگا جو مختلف علاقوں سے گزرے گا۔

اس دوران کسی بھی قسم کی ٹریفک کو لی مارکیٹ ، آغا خان جماعت خانہ ، کرین چورنگی ، جی الانہ روڈ ، کھارادر اور مائی کولاچی سے ایم اے جناح روڈ کی جانب جانے کی اجازت نہیں ہوگی، علاوہ ازیں جلوس سے منسلک روٹ کی گلیوں کو بھی رکاوٹیں کھڑی کر کے مکمل بند کیا جائے گا۔

کیماڑی سے جناح برج ٹاور کی جانب آنے والی گاڑیوں کو متبادل راستوں کی جانب موڑا جائے گا۔

متبادل روٹ

میری ویدر ٹاور سے ایم اے جناح روڈ کے لیے آنے والی گاڑیوں کو  آئی آئی چندریگر روڈ کی طرف موڑا جائے گا، اسی طرح ممتاز حسن روڈ، ایوان تجارت روڈ، شارع لیاقت جنکشن سے سندھ مدرسۃ الاسلام، شارع لیاقت جنکشن سے حسن علی آفندی روڈ، شارع لیاقت جنکشن سے سول اسپتال روڈ، فریسکو چوک، ہائی کورٹ روڈ، سندھ سیکریٹریٹ اور ریگل چوک کی طرف گاڑیاں موڑی جائیں گی۔

شارع لیاقت سے منسلک تمام گلیوں میں ٹریفک جانے کی اجازت ہوگی جبکہ پریڈی اسٹریٹ جنکشن سے ڈاکٹر دائود پوتہ روڈ، عبداللہ ہارون جنکشن سے غفور چیمبر، جنکشن آغا خان روڈ سے گرامر اسکول، صدر سے لائنزایریا اور کوریڈور تک کا راستے پر بھی اجازت ہوگی۔

اسی طرح شاہراہ فیصل سے شارع قائدین تک سڑک پر گاڑیوں کی آمد و رفت جاری رہے گی جبکہ نمائش جانے والے انڈر بائی پاس کو بند کیا جائے گا۔

یونیورسٹی روڈ کی  جانب سے آنے والے ٹریفک کو براستہ نیو ایم جناح روڈ، جیل چورنگی فلائی اوور اور کشمیر روڈ کی جانب گھما دیا جائے گا۔

اندرونی گلیوں سے پیپلز چورنگی آنے والے ٹریفک کو بائیں جانب عائشہ عزیز چورنگی ، بائیں جانب شارع قائدین یا سیدھا کوریڈور تھری سے صدر کی جانب جانے کی اجازت ہوگی۔

گرومندر سے ایم اے جناح روڈ جانے والی سڑک کو بنوری ٹاؤن سگنل سے بند کردیا جائے گا جبکہ ٹریفک کو سینٹرل جیل کی جانب موڑا جائے گا۔

اسی طرح لسبیلہ، بزنس روڈ سے ایم اے جناح روڈ کی جانب طرف آنے والے روٹ پر گاڑیوں کی آمد و رفت مکمل بند ہوگی جبکہ جہانگیر روڈ، جمشید روڈ بنوری لائٹ سگنل سے ٹریفک کو نیو ایم اے جناح روڈ اور جیل کی جانب موڑ دیا جائے گا۔

علاوہ ازیں تبت سینٹر تا ریگل چوک اور ریگل چوک تا آرام باغ مسجد تک کسی کو گاڑی پارک کرنے کی اجازت نہیں ہوگی۔

Comments

comments

یہ بھی پڑھیں