کراچی: شہر قائد لٹیروں کی جنت بن گیا ہے، شہر کے مختلف علاقوں میں ڈکیتی مزاحمت پر مزید 2 افراد سفاکی سے قتل کر دیے گئے۔
تفصیلات کے مطابق کراچی پولیس کے دعوؤں کے بر عکس اسٹریٹ کرائمز میں ملوث لٹیروں کے ہاتھوں شہریوں کے جان و مال کو شدید خطرات لاحق ہیں، لوٹ مار کی وارداتوں کے دوران مزاحمت پر بے جھجھک شہریوں کو گولی مار دی جاتی ہے۔
گزشتہ رات شہر میں دو مزید جانیں لی گئی ہیں، ان میں سے ایک واقعہ اورنگی ٹاؤن کے علاقے بجلی نگر میں پیش آیا، جب کہ دوسرا واقعہ بلدیہ ٹاؤن میں فٹ بال گراؤنڈ کے قریب پیش آیا۔
اورنگی ٹاؤن، بجلی نگر میں 55 سالہ شہر جس کی شناخت طارق کے نام سے ہوئی ہے، گھر کے باہر دوستوں کے ساتھ بیٹھا تھا، کہ موٹر سائیکل پر سوار 3 لٹیرے آئے اور لوٹ مار کرنے لگے، طارق نے مزاحمت کی تو لٹیرے نے اسے گولی مار دی، جس سے وہ جاں بحق ہو گیا، پولیس حکام کے مطابق مقتول 4 بچوں کا باپ تھا اور مزدوری کرتا تھا، اس کا آبائی تعلق اٹک سے تھا۔
دوسرے واقعے میں کراچی کے علاقے بلدیہ نمبر 8، فٹ بال گراؤنڈ کے قریب فائرنگ سے ایک جاں بحق ہوا، جس کی شناخت 35 سالہ ناصر کے نام سے ہوئی ہے، پولیس حکام کے مطابق مقتول پھل فروش تھا اور گھر آ رہا تھا کہ گھر کے قریب ہی لٹیروں نے اسے لوٹنے کی کوشش کی، لیکن مقتول نے مزاحمت کی تو لٹیرے نے اسے گولی مار دی۔
