رپورٹر: عدنان راجپوت
کراچی: ثمرین نامی خاتون کو موٹر سائیکل سے اتار کر گولی مارنے کے واقعے میں پیش رفت ہوئی ہے، واقعے کا مقدمہ درج ہو گیا، تاہم دوسری طرف قتل کا معمہ حل نہیں ہو سکا ہے۔
تفصیلات کے مطابق کراچی میں کورنگی دارالعلوم کے قریب فائرنگ سے ایک خاتون جاں بحق ہو گئی تھی، مقتولہ کی شناخت 40 سالہ ثمرین کے نام سے ہوئی ہے، ثمرین کو نامعلوم شخص نے موٹر سائیکل سے اتار کر گولیاں مار دی تھیں، معلوم ہوا ہے کہ مقتولہ داؤد چورنگی معین آباد نمبر ایک کی رہائشی تھی۔
ایس پی لانڈھی کیپٹن اظہر نے بتایا کہ واقعے کا مقدمہ مقتولہ کے چاچا گل تاج کی مدعیت میں قتل کی دفعات کے تحت درج کر لیا گیا ہے، مقتولہ نے پہلے شوہر سے طلاق لے کر دوسری شادی کر رکھی تھی، اور وہ 3 بچوں کی ماں تھی، جب کہ اس کے دوسرے شوہر کا نام سرور عرف سرو ہے۔
مدعی کے مطابق مقتولہ ذہنی مریضہ ہونے کی وجہ سے بغیر بتائے گھر سے غائب ہو جاتی تھی، واقعے کے روز مقتولہ اپنی بہن عالیہ کے گھر گئی ہوئی تھی، جہاں سے وہ کسی نامعلوم موٹر سائیکل سوار کے ساتھ گئی۔
کراچی: لڑکی کو موٹر سائیکل سے اتار کر قتل کرنے کا واقعہ، عینی شاہدین نے کیا دیکھا؟
ایف آئی آر کے مطابق نامعلوم ملزم ثمرین کو کراچی دارالعلوم کے قریب جھاڑیوں میں لے کر گیا، اور ثمرین کو کسی نامعلوم رنجش کی بنا پر موٹر سائیکل سے اتار کر فائر کر دیے، مقتولہ کو چہرے پر 2 گولیاں لگیں جو موت کی وجہ بنیں۔
