کراچی واٹر اینڈ سیوریج بورڈ کو ختم کرکے کارپوریشن بنانے کی تیاریاں مکمل کرلی گئیں، نئے قانون کے لیے مسودہ اسٹینڈنگ کمیٹی کو ارسال کردیا گیا۔
تفصیلات کے مطابق کمیٹی سے ایک ہفتے میں منظوری کے بعد مسودہ اسمبلی میں پیش کیا جائے گا اور اسمبلی سے منظوری کے بعد ایکٹ لاگو ہوجائے گا۔
مذکورہ قانون کی منظوری کے بعد وزیراعلیٰ سندھ مراد علی شاہ کراچی واٹراینڈ سیوریج کارپوریشن کے انتظامی معاملات کے نگراں ہوں گے۔
قانون پاس ہونے کے بعد چیئرمین اور ایم ڈی اہم فیصلے کرسکیں گے، کراچی واٹراینڈ سیوریج کارپوریشن ٹیرف میں اضافےکی مجاز ہوگی۔
اطلاعات کے مطابق کراچی شہر میں نئے واٹر میٹر نصب کے جائیں گے، پرمٹ پر صنعتی فضلے کو سیوریج لائن میں شامل کیا جاسکے گا۔
فراہمی و نکاسی آب کی لائنوں کو توڑنے پر بھاری جرمانے و سزا کا اطلاق ہوگا، غیرقانونی ہائیڈرنٹ کے قیام پر50 لاکھ جرمانہ اور 5سال قید کی سزا ہوگی۔
اس کے علاوہ واٹراینڈ سیوریج بورڈ ٹریبونل قائم کیا جائے گا، کارپوریشن کی زمینوں، املاک پر قبضے اور میٹر توڑنے پر 10لاکھ روپے جرمانہ عائد کیا جائے گا۔
تین ماہ قبل سندھ کابینہ نے اس ضمن میں قانون پاس کیا تھا اور قانون پاس ہونے سے قبل ہی بورڈ کو ختم کردیا گیا۔
