کراچی: مچھر کالونی سے پولیس نے ٹیلی کمیونیکیشن کمپنی کے ملازمین کے قتل میں ملوث مرکزی ملزم کو گرفتار کرلیا۔
تفصیلات کے مطابق مچھرکالونی میں ہجوم کے تشدد سے 2 افرادکی ہلاکت کے کیس میں پیشرفت ہوئی ہے، کیماڑی پولیس نےکارروائی کرتے ہوئے ٹیلی کام کمپنی کے ملازمین کے قتل میں ملوث مرکزی ملزم کو گرفتار کرلیا۔
پولیس کا کہنا ہے کہ ملزم مولوی خلیل ٹیلی کام کمپنی کے ملازمین کو قتل کرنے میں ملوث ہے، ملزم واقعے کے بعد فرار ہوگیا تھا، انٹیلی جنس معلومات پر گرفتار کیا گیا۔
پولیس کا کہنا ہے کہ گزشتہ برس ڈاکس تھانےکی حدود میں ہجوم نے تشدد کر کے 2 ملازمین کو قتل کیا تھا، پولیس کی جانب سے کیس میں 40 سے زائد افراد کو گرفتار کیا جا چکا ہے۔
مچھر کالونی واقعہ
واضح رہے کہ کراچی کی مچھرکالونی میں ٹیلی کام کمپنی کے بہیمانہ طریقے سے قتل ہونے والے دونوں ملازمین علاقے میں موبائل فونز سگنلز چیک کرنے آئے تھے، ایک بچے سے راستہ پوچھا تو لوگوں نے اغوا کار سمجھ کر ڈنڈوں، پتھروں، لاتوں اور گھونسوں سے اتنا مارا کہ دونوں موقع پر ہلاک ہوگئے۔
ابتدائی طور پرپولیس کا کہنا تھا کہ لوگوں کا کہنا ہے دونوں افراد بچوں کو اغوا کرنے کی کوشش کر رہے تھے جنہیں رنگے ہاتھوں پکڑا اور پھر تشدد کا نشانہ بنایا گیا تھا جس پر ڈی آئی جی ساؤتھ نے واقعے کا نوٹس لیتے ہوئے ایس ایس پی کیماڑی سے رپورٹ طلب کر لی تھی۔
دوسری جانب ایس ایس پی کیماڑی فدا جانوری کا کہنا تھا کہ دونوں افراد ٹیلی کام کمپنی کے ملازم تھے، واقعے کی تمام پہلوں سے تفتیش کی جا رہی ہے، نوجوانوں کے قتل میں ملوث افراد کے خلاف قانون کے مطابق کارروائی کی جائے گی۔
