سرگودھا: پنجاب کے شہر سرگودھا میں ڈیڑھ ماہ کا بچہ اغواء ہونے کی خبر جھوٹ نکلی، بچے کا سفاک باپ ہی واردات میں ملوث نکلا۔
سرگودھا کے گاؤں 79 شمالی کے رہائشی عدنان نے خود اپنا بیٹا بے اولاد جوڑے کو فروخت کیا اور بعد میں اغواء کی ایف آئی آر نامعلوم فراد کیخلاف درج کرادی۔
اس حوالے سے پولیس کاکہنا ہے کہ تفتیش کے بعد یہ انکشاف ہوا کہ مغوی بچے کا والد ہی اس کا اغواء کار ہے، والد نے بچے کو 1 لاکھ 20 ہزار کے عوض فروخت کیا، بچے کے والد عدنان نے بچے کو2 خواتین کی مدد سے بے اولاد جوڑے کو فروخت کیا، بچے کو فروخت کرکے والد عدنان نے بچے کے اغواء کا مقدمہ درج کرایا تھا۔
پولیس نے جیو فینسنگ اور جدید ٹیکنالوجی کی مدد سے بچہ بے اولاد جوڑے سے بازیاب کرا لیا، بچہ خریدنے والے جوڑے اور ملزم باپ عدنان کو گرفتار کر لیا، پولیس نے 4 ملزمان کو حراست میں لے کر مزید کارروائی کا آغاز کردیا ہے جبکہ بچہ ماں کے حوالے کردیا گیا۔
