لاہور: ممبر پنجاب بار کونسل کے گھر پر ڈیڑھ کروڑ کی ڈکیتی کرنے والی خواتین گرفتار ہو گئیں۔
تفصیلات کے مطابق لاہور میں ممبر پنجاب بار کونسل منیر بھٹی کے گھر ہونے والی ڈیڑھ کروڑ روپے کی ڈکیتی کی 3 ملزم خواتین کو گرفتار کر لیا گیا۔
منیر بھٹی کے گھر پر ڈکیت خواتین نے واردات میں ڈیڑھ کروڑ روپے لوٹے تھے، اور ملازم کو قتل کر دیا تھا۔
پولیس رپورٹ کے مطابق منیر بھٹی اہل خانہ کے ہمراہ گھر واپس لوٹے تو گھریلو ملازم کی پھندا لگی لاش ملی، اور گھر سے ڈیڑھ کروڑ روپے کے طلائی زیورات غائب تھے۔
سی آئی اے کینٹ پولیس نے 30 گھنٹوں میں ملزمان کو ٹریس کر کے بسمہ زوہن، امبرین اور کویتا مسیح کو دھر لیا۔
پولیس حکام نے بتایا کہ خواتین ملزمان ڈکیتی کے لیے گھر میں داخل ہوئیں، سی سی ٹی وی کیمرے بند کیے، اور مزاحمت کرنے پر ملازم کو گلا دبا کر قتل کر دیا، پولیس نے مال مسروقہ، طلائی زیورات، گھڑیاں، چوری کی گئی کلاشنکوف بھی برآمد کر لی۔
