راولپنڈی: نامعلوم افراد نے فائرنگ کرکے وکیل کو بچوں کے سامنے قتل کر دیا، پولیس کا کہنا ہے کہ واقعہ ٹارگٹ کلنگ کا لگتا ہے۔
تفصیلات کے مطابق راولپنڈی کے علاقے ڈھیری حسن آباد میں نامعلوم افراد نے گاڑی پر فائرنگ کردی ،فائرنگ سےگاڑی میں سوارایڈووکیٹ شیخ عمران جاں بحق ہوگئے۔
پولیس نے بتایا کہ ایڈووکیٹ شیخ عمران بچوں کو اسکول چھوڑکر گھرجا رہے تھے کہ نامعلوم ملزمان نے ٹارگٹ کیا اور سر میں دو گولیاں ماریں جس سے وہ موقع پر ہی جاں بحق ہوگئے۔
ابتدائی اطلاعات کے مطابق موٹر سائیکل سواروں نے فائرنگ کی ، وکیل کی لاش کو پوسٹ مارٹم کیلئے اسپتال منتقل کردیا گیا ہے۔
تھانہ سول لائن نے واقعےکی تفتیش شروع کردی ہے، واقعہ ٹارگٹ کلنگ کا لگتا ہے تاہم تحقیقات کے بعد صورتحال واضح ہو گی۔
پولیس کا کہنا ہے کہ موقع سے مزید شواہد جمع کرنے کے لیے فرانزک ٹیم کو طلب کر لیا ہے
سی پی او نے ایس پی پوٹھوہارسے رپورٹ طلب کرکے ملوث ملزمان کی فوری گرفتاری کا حکم دے دیا ہے۔
دوسری جانب تھانہ سول لائن لائن کے علاقہ میں فائرنگ سے وکیل کے جاںبحق ہونے کے واقعے پر ہائی کورٹ بار ایسوسی ایشن راولپنڈی کا آج ہڑتال کرنے کا اعلان کردیا ہے۔
