لبنان میں خود کشی کرنے والے نوجوان نے اپنے دوست کے نام درد بھرے الفاظ میں آخری جذباتی آڈیو پیغام بھیجا۔
العربیہ نیوز کے مطابق لبنان میں موسیٰ الشامی نامی نوجوان نے خود کو گولی مارکر اپنی زندگی ختم کرلی، جس کی لاش گھر کے باہر ایک پستول کے ساتھ ملی۔
لبنانی نوجوان نے بے روزگاری اور معاشی حالات سے تنگ آکر خود کشی کرنے سے قبل اپنے ایک دوست کو آخری آڈیو پیغام بھیجا، جس میں الشامی نے اپنے دوست کو کہا میں تھک چکا ہوں اور اپنے آپ سے بیزار ہوں، میرے تینوں بچے تمھارے پاس امانت ہے ان کا خیال رکھنا۔
سوشل میڈیا سے اس واقعے کی ملنے والی معلومات نے اس بات کی تصدیق کی کہ نوجوان نے خودکشی کی اور خود کشی کی وجہ معاشی بحران ہے جس نے پوری دنیا کو لپیٹ میں لے رکھا ہے۔
خود کشی کرنے والے نوجوان نے اپنے بچوں کی دیکھ بھال کرنے کے لیے اپنے دوست کوپیغام میں کہا ہے کہ میں اپنے بچوں کے لیے رزق کا انتظام نہیں کرسکتا، میں اپنے بچوں کا خیال رکھنے کی التجا کرتا ہوں۔
آڈیو پیغام میں الشامی نے کہا کہ میری نظرمیں آپ کے علاوہ اور کوئی ایسا نہیں جو میرے بچوں کا خیال رکھے، آپ بڑے دل والے ہیں مگر میں حالات سے تنگ آگیا ہوں، پرسکون ہو جاؤ میرے بچوں۔
اس نے مزید کہا کہ مجھے معاف کر دو، میں نے تمہیں کبھی تکلیف نہیں پہنچائی اور خدا گواہ ہے، موسیٰ سے کہو کہ تمہارا باپ تم سے بہت محبت کرتا ہے لیکن اب وہ برداشت نہیں کر سکتا۔ میں تھک گیا ہوں۔
