لاہور ہائی کورٹ کے فیصلے کے بعد زمان پارک کے باہر پی ٹی آئی کارکنان نے منایا، اس موقع پر دھول کی تھاپ پر بھنگڑے ڈالے اور خوب نعرے بازی کی۔
فیصلہ سنتے ہی کارکنان کی بڑی تعداد چیئرمین عمران خان کی رہائش گاہ زمان پارک پہنچ گئی جہاں جشن کا سماں بن گیا، ایک دوسرے کو مبارکباد دیتے رہے۔
اس موقع پر پی ٹی آئی کارکنوں نے "عمران تیرے جانثار بےشمار”کے فلک شگاف نعرے لگائے، پی ٹی آئی این اے120کے امیدوارعباد فاروق کا کہنا تھا کہ عدالت کا فیصلہ پاکستان کی عوام، آئین وجمہوریت کی جیت ہے۔
انہوں نے کہا کہ ن لیگ ڈرنے کے بجائے الیکشن کے میدان میں تحریک انصاف کا مقابلہ کرے، پنجاب کا الیکشن پی ڈی ایم کیخلاف ریفرنڈم ثابت ہوگا۔
پنجاب میں عام انتخابات سے متعلق عدالتی حکم پر سابق اسپیکر پنجاب اسمبلی سبطین خان نے کہا ہے کہ یہ فیصلہ عوامی امنگوں کے عین مطابق آیا ہے، پوری قوم کو مبارکباد پیش کرتا ہوں۔
سابق اسپیکرپنجاب اسمبلی نے کہا کہ الیکشن کمیشن تاخیر کے بجائے فوری الیکشن شیڈول جاری کرے، فیصلہ عوام کی جیت ہے، عدالت نے ملک کو آئینی بحران سے نکالنے میں کلیدی کردار ادا کیا ہے۔
مزید پڑھیں : لاہور ہائی کورٹ کا تین ماہ میں پنجاب میں الیکشن کرانے کا حکم
یاد رہے کہ لاہور ہائی کورٹ کے جسٹس جواد حسن نے پاکستان تحریک انصاف کی درخواست پر محفوظ کیا گیا فیصلہ سنادیا جس کے مطابق عدالت کی جانب سے جاری کیے گئے مختصر فیصلے میں کہا گیا کہ الیکشن کمیشن 90 روز کے اندر صوبہ پنجاب میں الیکشن کرائے۔
