جدید ٹیکنالوجی کا استعمال اب صرف ضروریات زندگی تک ہی محدود نہیں رہا بلکہ اس سے سماجی اور فلاحی کام بھی بہتر طریقے سے انجام دیئے جارہے ہیں۔
اگر آپ کو ایسا لگتا ہے کہ ڈرون کیمرے صرف فضائی تصاویر اور ویڈیوز بنانے کے لیے ہی کارآمد ہیں تو آپ غلطی پر ہیں، اسپین میں پیش آنے والا یہ واقعہ آپ کا نقطہ نظر تبدیل کردے گا۔
اس کی ایک تازہ مثال اس وقت سامنے آّئی جب ایک لائف گارڈ ڈرون نے سمندر کی لہروں میں زندگی اور موت کی کشمکش میں گھرے 14سالہ نوجوان کی جان بچائی۔
سوشل میڈیا پر وائرل ہونے والی ویڈیو نے صارفین کو حیران کردیا، لائف گارڈ ڈرون نے ایک 14 سالہ لڑکے کی جان بچائی جو اسپین کے شہر والنسیا کے ساحل پر ایک طاقتور لہر میں پھنس گیا تھ
ویڈیو میں دیکھا جاسکتا ہے کہ ایک لائف گارڈ ڈرون نے نوجوان کا سراغ لگایا اور سمندر میں لائف گارڈ کی ڈیوٹی پر موجود کشتی میں سوار افراد کے پہنچنے سے قبل ایک لائف جیکٹ نوجوان کے ڈوبنے سے کچھ لمحات پہلے اس کی جانب پھینک دی۔
مذکورہ ڈرون سے حاصل کی گئی فوٹیج میں لڑکا جدوجہد کرتے ہوئے اور لائف جیکٹ کو پکڑتے ہوئے دکھایا گیا ہے۔ اس سے پہلے کہ کوسٹ گارڈ کی ایک کشتی اسے بچانے کے لیے موقع پر پہنچتی اس سے پہلے ہی وہ لائف جیکٹ پہن لیتا ہے۔
