ریاض: سعودی عرب میں سیر و تفریح کے لیے جانے والے نوجوانوں کے ساتھ ہولناک حادثہ پیش آیا، آسمانی بجلی گرنے سے ایک دوست جاں بحق اور 2 زخمی ہوگئے۔
اردو نیوز کے مطابق سعودی عرب کی المخواہ کشمنری میں آسمانی بجلی گرنے سے 1 نوجوان جاں بحق جبکہ دو زخمی ہوگئے۔
جاں بحق ہونے والے نوجوان خالد الغامدی کے معمر والد نے بتایا کہ ان کا بیٹا موسم سے لطف اندوز ہونے کے لیے اپنے ساتھیوں کے ساتھ تفریح کے لیے گیا جہاں انہوں نے کھانے کا پروگرام بنایا تھا۔
تمام دوست کھانے سے فارغ ہونے کے بعد تفریحی مقام پر بیٹھے باتوں میں مصروف تھے کہ اچانک آسمانی بجلی ان پر آگری جس سے خالد الغامدی موقع پر ہی ہلاک ہوگیا جبکہ اس کے 2 دوست زخمی ہوئے۔
واقعے کی اطلاع ملتے ہی ہلال حمر کی ٹیمیں جائے وقوعہ پر پہنچ گئیں جنہوں نے زخمیوں کو فوری طبی امداد دیتے ہوئے اسپتال منتقل کردیا، مرنے والے نوجوان کی نعش سرد خانے میں رکھوا دی گئی۔
والد کا کہنا تھا کہ ان کا بیٹا حال ہی میں تعلیم مکمل کر کے فارغ ہوا تھا اور ملازمت کی تلاش میں تھا مگر شاید قدرت کو یہی منظور تھا۔
