لاہور : جنوبی پنجاب میں آسمانی بجلی گرنے سے 21 اموات ہوئیں جبکہ 5 افراد زخمی بھی ہوئے، جاں بحق افراد میں 5 خواتین اور7 بچے بھی شامل ہیں۔
تفصیلات کے مطابق ملک بھر کی طرح پنجاب اور بلوچستان میں بھی شدید بارشوں کا سلسلہ جاری ہے، ہفتے کے روز دونوں صوبوں میں آسمانی بجلی گرنے کے درجنوں خوفناک اور غیرمعمولی واقعات رپورٹ ہوئے۔
پی ڈی ایم اے پنجاب نے بتایا کہ صوبےمیں آسمانی بجلی گرنے کےمتعدد واقعات میں اکیس افراد لقمہ اجل بنے جبکہ پانچ زخمی ہوئے، مرنےوالوں میں سات بچےاور پانچ خواتین بھی شامل تھیں۔
پی ڈی ایم اے پنجاب کا کہنا تھا کہ سب سے زیادہ ہلاکتیں رحیم یارخان میں ہوئیں ، جہاں آدھے گھنٹے کی بارش کےدوران پچاس سےستر کلومیٹر کے علاقے میں آسمانی بجلی گرنے کے مختلف واقعات میں نو لوگوں کی جان چلی گئی۔
مظفر گڑھ ، راجن پور، لودھراں ، بہاولپور اور بہاولنگر میں بھی واقعات پیش آئے جبکہ رحیم یار خان میں نو، لودھراں، بہاولنگر،بہاولپور میں تین تین، مظفر گڑھ ، راجن پور اورکوٹ ادو میں ایک ایک ہلاکت ہوئی۔
پی ڈی ایم اے نے ہدایات جاری کی کہ بارشوں کے دوران آسمانی بجلی گرنے سےاموات ہورہی ہیں، آسمانی بجلی عموماًکھلی اوربلندجگہوں پر گرتی ہے ، اس لئے احتیاط کریں۔
پی ڈی ایم اے نے اپیل کی کہ شہری بارش کےدوران درختوں کےنیچےبیٹھنے سےگریزکریں اور کھلے آسمان تلے چمکداراشیانہ رکھیں جبکہ جانوروں کو کھلے مقامات پرنہ باندھیں۔
الرٹ میں کہا گیا کہ لوہے کی چیزوں،گاڑیوں، کھمبوں سےدور رہیں اور میدانی علاقوں،ساحلوں اور دوسرےعلاقوں میں نہ جائیں۔
گزشتہ روزبارش کے دوران کراچی کے علاقے نیا ناظم آباد میں بھی گھرپرآسمانی بجلی گرنےکاواقعہ پیش آیا،جس سےگھراوربرقی آلات کو نقصان پہنچا، تاہم خوش قسمتی سے کوئی جانی نقصان نہیں ہوا۔
