دنیائے فٹبال کے بے تاج بادشاہ لائنل میسی کی بے مثال خدمات کے اعتراف میں جنوبی امریکی فٹبال فیڈریشن میوزیم کی جانب سے انہیں بڑے اعزاز کے ساتھ نوازا گیا ہے۔
لیجنڈ فٹبالر لیونل میسی کو خراج تحسین پیش کرنے کیلئے جنوبی امریکا کی فٹ بال فیڈریشن نے اسٹار فٹبالر کا مجسمہ تیار کیا ہے جو پیرا گوئے میں قائم میوزیم میں رکھا جائے گا ہیڈ کوارٹر میں کپتان کے مجسمہ کے تقریب رونمائی منعقد کی گئی۔
غیر ملکی خبر رساں ادارے کی رپورٹ کے مطابق ورلڈکپ فٹبال جیتنے والے ارجنٹائن کے معروف کپتان لائنل میسی کا مجسمہ پیلے اور میرا ڈونا کے ساتھ نصب کیا جائے گا۔
فیفا ورلڈ کپ کی ٹرافی تھامے لیونل میسی کا لائف سائز مجسمہ لیجنڈری میرا ڈونا اور برازیل کے عظیم فٹبالر پیلے کے برابر نصب کیا جائے گا۔
جنوبی امریکی فٹبال فیڈریشن کے میوزیم میں اپنا مجسمہ نصب کیے جانے کے حوالے سے میسی کا کہنا تھا کہ میں نے کبھی خواب میں بھی نہیں سوچا تھا، بچپن سے میرا خواب پیشہ ور فٹبال پلیئر بننا تھا، میں زندگی میں یہی کام کرنا چاہتا تھا جس سے مجھے عشق تھا۔
انہوں نے کہا کہ یہاں تک پہنچنے کیلئے میں نے طویل مسافت طے کی ہے، کئی فیصلے اور کئی ناکامیاں سمیٹی ہیں لیکن میں نے ہمیشہ آگے کی طرف دیکھا اور میں ہمیشہ فتح کا جشن منانا چاہتا تھا۔
یاد رہے کہ اس سے قبل میسی کی جانب سے اپنے 800 گول مکمل کرنے کے بعد ارجنٹینا کی فٹبال فیڈریشن نے انہیں خراج تحسین پیش کرتے ہوئے قومی ٹیم کے ٹریننگ سینٹر کو "میسی” کے نام سے منسوب کیا تھا۔