واشنگٹن : امریکی ریاست آئیووا میں ایک انجن والا چھوٹا طیارہ پرواز بھرنے کے کچھ دیر کے بعد فضا میں ہچکولے کھاتے ہوئے زمین بوس ہوگیا جس کے نتیجے میں طیارے میں موجود دونوں افراد ہلاک ہوگئے۔
غیرملکی خبر رساں ادارے کی رپورٹ کے مطابق گزشتہ شام میڈیسن کاؤنٹی اوہائیو میں چھوٹے ہوائی جہاز (سیسنا طیارے) گرنے کے نتیجے میں دو افراد موقع پر ہی ہلاک ہوگئے، حادثہ فنی خرابی کے باعث پیش آیا۔
طیارے میں بائیں سیٹ پر بیٹھے شخص کی شناخت کولمبس کے رہائشی 43 سالہ اطہر محمد اشرف کے نام سے ہوئی ہے جبکہ دوسرے شخص کی لاش تاحال شناخت نہیں ہوسکی ہے۔
اوہائیو کے متعلقہ حکام اور نیشنل ٹرانسپورٹیشن سیفٹی بورڈ نے بتایا ہے کہ شام 6 بجکر20 منٹ کے قریب پیش آیا سنگل انجن سیسنا طیارہ رن وے کے قریب گر کر تباہ ہوا، اس کا بایاں پر ٹوٹ چکا تھا۔
حکام کا خیال ہے کہ پائلٹس طیارے کو لینڈ کرنے کی کوشش کر رہے تھے جب یہ حادثہ پیش آیا۔ واقعے کے بعد ایئر پورٹ کو بند کردیا گیا ہے، مزید تحقیقات جاری ہیں۔
یاد رہے کہ اس سے قبل سال 2019کے ماہ ستمبر میں بھی سنگل انجن والا بیچ کرافٹ طیارہ ہوائی اڈے پر لینڈنگ کرتے ہوئے گر کر تباہ ہوا تھا جس کے نتیجے میں جہاز کا پائلٹ بھی ہلاک ہوگیا تھا۔