پنجاب میں غیرت کے نام پر دیور نے بھابھی کو موت کے گھاٹ اتار دیا۔
اے آر وائی نیوز کے مطابق پنجاب کی ضلع لیہ کی تحصیل چوبارہ چک نمبر 318 ٹی ڈی اے میں دیور نے بھابھی کو غیرت کے نام پر قتل کردیا۔
پولیس کا کہنا ہے کہ مبینہ طور پر خاتون کا شوہر اور سسر بھی قتل کی واردات میں ملوث ہیں۔
تفتیشی حکام کا کہنا ہے کہ ملزمان نے تین بچوں کی ماں کو گلے میں دوپٹہ ڈال کر قتل کیا ہے، ملزمان کی گرفتاری کے لیے چھاپے مارے جارہے ہیں۔
واضح رہے کہ گزشتہ روز سیالکوٹ میں بے رحم ماں نے پسند کی شادی کرنے والی بیٹی کو موت کے گھاٹ اتار دیا تھا۔
پولیس کا کہنا تھا کہ واقعہ تھانہ مرادپور کی حدود اسماعیل آباد میں پیش آیا تھا جہاں پسند کی شادی کیلئے گھر چھوڑنے والی بیٹی کو ماں نے قتل کیا۔
مقتولہ شادی شدہ تھی اور گھر چھوڑ کر جانے پر اہل خانہ نے اغوا کا مقدمہ درج کرایا تھا۔
پولیس کا کہنا تھا کہ مقتولہ نے عدالت میں مقدمہ جھوٹا ہونے کا بیان دیا ہے تھا جس پر اہل خانہ سخت ناراض تھے اور ماں نے طیش میں آکر بیٹی کو قتل کر دیا۔
پولیس نے واقعے کا مقدمہ درج کر کے ملزمہ کو گرفتار کر لیا تھا۔
