ڈکیتی کی عجیب و غریب واردات میں باپ نے انجانے میں بیٹے کو ہی لوٹ لیا۔
غیرملکی خبررساں ادارے کی رپورٹ کے مطابق اسکاٹ لینڈ میں اے ٹی ایم مشین میں 45 سالہ شخص نے 17 سالہ نوجوان کو چھری سے حملہ کرنے کی دھمکی دے کر لوٹنے کی کوشش کی تو پتا چلا کہ ڈکیت باپ اپنے ہی بیٹے کو لوٹنے آیا ہے۔
بیٹے نے اے ٹی ایم سے دس پاؤنڈز نکالے تھے تاہم باپ نے اجنبی سمجھ کر بیٹے کو ہی پیچھے گردن سے پکڑ کر پیسے مانگے۔
تاہم لڑکے نے پیسے مانگنے والے شخص کی آواز پہچان لی جس پر وہ حیران رہ گیا، لڑکے نے فوراً اپنے باپ سے پوچھا کیا آپ واقعی ایسا کر رہے ہیں، آپ کو پتا ہے میں کون ہوں؟ جواب میں باپ نے کہا تم جو کوئی بھی ہو، مجھے کوئی پرواہ نہیں۔
یہ بات سن کر لڑکے نے پلٹ کر کہا کہ آپ کیا کر رہے ہیں؟ جس پر والد نے شرمندہ ہوتے ہوئے کہا کہ مجھے معاف کر دو میں مجبور ہوں۔
بیٹے نے گھر میں واقعے سے متعلق بتایا بعدازاں پولیس نے ملزم کو گرفتار کرلیا جس کے بعد اسے 26 ماہ قید کی سزا سنائی گئی۔
