لاہور: وزیر اعلیٰ پنجاب مریم نواز نے آج عید کا بیشتر دن بے گھر اسپیشل بچوں، خواتین اور بزرگوں کے اداروں میں گزارا۔
وزیر اعلیٰ پنجاب مریم نواز بے سہارا، بے گھر اور بے نوا لوگوں کے درمیان پہنچ گئیں، انھوں نے سوشل ویلفیئر کمپلیکس ٹاؤن شپ میں چمن، عافیت، اور دارالفلاح کا دورہ کیا، اور بزرگ خواتین کو حج پر بھجوانے کے لیے اقدامات کا حکم دیا۔
وزیر اعلیٰ مریم نواز نے سب کو تحائف دیے اور بچوں کو کھلونے اور مٹھائیاں دیں، انھوں نے اسپیشل بچوں کے ساتھ مل کر عید کیک بھی کاٹا اور انھیں کھلایا، مریم نواز کے گفٹ پیش کرنے پر بچوں نے ان کا شکریہ ادا کیا۔
وزیر اعلیٰ نے اولڈ ایج ہوم عافیت میں مقیم 39 بزرگ مرد و خواتین کی خیریت دریافت کی، مریم نواز نے مریض خاتون کو ساتھ بٹھایا اور چوڑیاں بھی پہنائیں، مریم نواز کے عید مبارک کہنے پر بزرگ آبدیدہ ہو گئے، انھوں نے نواز شریف کی طرف سے بزرگوں کو سلام بھی دیا۔
وزیر اعلیٰ مریم نوازشریف کا بےسہارا بزرگ خواتین کو سرکاری اخراجات پہ حج پر بھجوانے کے لئے اقدامات کا حکم pic.twitter.com/G2wut75bgW
— PMLN (@pmln_org) April 10, 2024
ایک بزرگ خاتون نے کہا عید پر میرے اپنے تو نہ آئے، مریم بیٹی آ گئی، میں بہت خوش ہوں، بیٹاں ملتی ہیں تو ٹھنڈ پڑ جاتی ہے، مریم نواز نے کہا میرا وقت آپ کے لیے ہی ہے، دعا کیجیے گا کہ عوام کی خدمت کر سکوں، مجھے میرے والدین کی دعائیں لگی ہیں، ماں باپ کی قدر نہ کرنے والے خسارے میں جاتے ہیں۔
مریم نواز والدہ مرحومہ کا ذکر کرتے ہوئے اداس ہو گئیں، انھوں نے دارالفلاح میں مقیم 8 بیوہ خواتین اور ان کے بچوں سے ملاقاتیں کیں، بعض یتیم اور کمسن بچوں کو پیار کیا اور گلے لگا لیا، بچوں اور ان کی ماؤں نے دعائیں دیتے ہوئے کہا آپ ہی تو ہماری اپنی ہیں، اللہ آپ کو سلامت رکھے۔
