لاہور: وزیر اعلیٰ پنجاب مریم نواز کی زیر صدارت خصوصی اجلاس میں آج جمعرات کو اسپیشل افراد کے لیے کئی اہم فیصلے کیے گئے ہیں۔
تفصیلات کے مطابق خصوصی اجلاس میں مریم نواز کو سوشل ویلفیئر اینڈ بیت المال ڈپارٹمنٹ سے متعلق تفصیلی بریفنگ دی گئی، اجلاس میں اسپیشل افراد کے لیے ’ہمت کارڈ‘ اور بیت المال کے تحت ’نگہبان کارڈ‘ کے اجرا کا فیصلہ کیا گیا۔
وزیر اعلیٰ مریم نواز نے حکام کو اسپیشل افراد کا مستند ڈیٹا مرتب کرنے کی ہدایت کی، معذوری کے ساتھ کام کرنے کے اہل افراد کے لیے قرضہ اسکیم جاری کی جائے گی، جس کے تحت اسپیشل افراد کو مالی خودمختاری کے لیے ایک سے 2 لاکھ روپے قرضہ دیا جائے گا، معذور افراد کو وہیل چیئر اور دیگر مددگار آلات مہیا کرنے کا فیصلہ بھی کیا گیا ہے۔
اجلاس میں ہر ڈویژن میں خواتین پر تشدد کے سد باب کے لیے وی اے ڈبلیو سی سینٹر بنانے کی منظوری دی گئی، لاہور، ملتان، فیصل آباد کے اسکلز ڈیولپمنٹ سینٹر کو فعال اور دیگر اضلاع میں قائم کرنے کا جائزہ لیا گیا، اسپیشل افراد کے لیے کام کرنے والی این جی اوز کے آڈٹ کی تجویز کا بھی جائزہ لیا گیا۔
مریم نواز نے سرکاری عمارتوں میں ریمپ اور اسپیشل پرسن باتھ روم کی پابندی پر عمل درآمد کے حوالے سے رپورٹ طلب کی، اجلاس میں ہر نئی سرکاری بلڈنگ میں اسپیشل افراد کے لیے باتھ روم اور ریمپ لازمی قرار دیا گیا۔
اس کے علاوہ اجلاس میں ویمن پروٹیکشن اتھارٹی ٹاسک فورس بنانے کی سفارشات پر غور کیا گیا، ہر ڈویژن میں منشیات بحالی سینٹرز کے قیام کی تجویز کا بھی جائزہ لیا گیا، سوشل ویلفیئر اینڈ بیت المال ڈپارٹمنٹ کی ڈیجیٹلائزیشن کی اصولی منظوری دی گئی۔
