پشاور: خیبر پختون خوا کے شہر پشاور میں ایم ڈی کیٹ ٹیسٹ جاری ہیں جس کے لیے پولیس کی جانب سے سیکیورٹی کے سخت انتظامات کیے گئے ہیں۔
تفصیلات کے مطابق آج پشاور میں ایم ڈی کیٹ کے امتحانات کے موقع پر انتہائی سخت حفاظتی انتظامات کیے گئے ہیں، امتحانات یونیورسٹی پبلک اسکول اور آل یونیورسٹی کالج فار بوائز میں ہو رہے ہیں۔
امتحانی ہال میں موبائل فون یا الیکٹرانک آلات کے استعمال پر پابندی ہے، امتحانی ہالز کے باہر پہلے پولیس اہل کاروں کی پھر امیدواروں کی تلاشی لی گئی۔
امتحانی مواد لانے والی گاڑی پر 10 پولیس اہلکار تعینات کیے گئے ہیں، ہر امتحانی ہال کے مین گیٹ پر 24 پولیس اہلکار اور 6 خواتین ہیلتھ ورکرز تعینات ہیں، امتحانی مراکز کی چھتوں پر 10 سے زائد اہلکار تعینات ہیں۔
خیبر پختون خوا کے 7 اضلاع میں 46 ہزار 220 امیدوار ٹیسٹ میں شریک ہیں، سینٹرز کے اطراف میں دفعہ 144 کا نفاذ کیا گیا ہے اور ٹیسٹ کے دوران موبائل سگنل معطل ہیں۔
