کراچی : محکمہ موسمیات نے آئندہ دنوں میں کراچی میں سردی میں مزید اضافے کی پیشگوئی کردی۔
تفصیلات کے مطابق کراچی میں رات سے سرد ہواؤں کا سلسلہ جاری ہے ، شمال مشرقی سمت سے چلنے والی ہواؤں کے باعث موسم مزید سرد ہوگیا۔
محکمہ موسمیات کا کہنا ہے کہ آئندہ دنوں میں کراچی میں سردی میں مزید اضافے کا امکان ہے۔
شہر کا موجودہ درجہ حرارت11 ڈگری سینٹی گریڈ ریکارڈ کیا گیا اور 12 کلو میٹر فی گھنٹہ کی رفتار سےہوا چل رہی ہے۔
محکمہ موسمیات نے بتایا کہ شہر میں دن میں درجہ حرارت 25 سے 27 ڈگری سینٹی گریڈتک رہے گا اور ہوا 20 کلومیٹر فی گھنٹہ کی رفتار سے چلے گی۔
دوسری جانب ملک کے مختلف حصوں میں موسم خشک اورسرد رہنے کا امکان ہے، محکمہ موسمیات کے مطابق گلگت بلتستان، آزاد کشمیر،کے پی کے اور بلوچستان کے بالائی علاقوں میں موسم شدید سرد رہنے کی توقع ہے جبکہ اسلام آباد، لاہور، پشاور میں موسم خشک اور سرد رہے گا۔
